100km Ultramarathon Trilogy gitakda sa Hunyo 30

CEBU, Philippines - Ang Cebu Ultra-runners Club ug Ungo Runners Club mopahigayon sa labing unang 100km ultramarathon trilogy nga sugdan sa Hunyo 30 didto sa lungsod sa Pinamungajan.

Ang first leg magsugod ug matapos didto sa Pinamungajan diin moagi kini sa pipila ka lungsod sa habagatang bahin sa Sugbu sama sa Toledo, San Fernando, Carcar, Barili ug Aloguinsan.

Sugdan ang dinaganay sa alas-6 sa gabii ug gilauman kining matapos sa alas-2 sa hapon sa Hulyo 1.

Gipahibalo sa mga organizers nga 100 lang ka partisipante ang ilang paapilon ug kadto lang mga hardcore runner ang adunay taas nga kasinatian sa ultramarathon ang gihatatan og prayoridad.

Ang registration fee nagkantidad og P1,500.

Usa ka specially-designed medal ang madawat sa tanang finishers.

Ang second leg gitakda sa Nobiyembre ug ang katapusang leg giplanong itakda sa sayong bahin sunod tuig.  (BANAT SPORTS)