Lheo Autoshop naka-ipsot sa Yan C Rico

CEBU, Philippines - Nakalingkawas gikan sa makutas nga duwa ang Lheo Autoshop dihang ilang gipakauwawan ang mas lig-on nga Yan C Rico, 75-74 sa nagkainit nga aksiyon sa LLBA Rollway Customs Brokerage Cup 2011 basketball tournament didto sa Villas Magallanes gym sa dakbayan sa Lapu-Lapu.

Pwerteng hugoto ang duwa pagsugod diin nagpuli-puli og pamupo og mga puntos ang duha ka kampo nga miresulta sa panagtabla, 19-all paghuman sa unang 10 minutos sa duwa.

Miarangkada ang Lheo Autoshop ni team owner Leo Almacen sa sunod nga kuwarter sa pagpangulo nilang Hesalta, Asuncion ug Cuadra nga pulos mihipos og double figures aron moposte og nuybe puntos nga bentaha sa halftime, 38-29.

Mihulga ang Yan C Rico ni team owner Rico Amores sa third period pinaagi sa paglusad og 26-18 aron sapsapan ang labaw ngadto na lang sa usa ka lusok, 55-56 nga nakapaukyab sa duwa.

Misamot ka kulbahinam ang duwa dihang nagbanos-banos og pamupo og mga puntos ang duha ka koponan, apan ang Lheo Autoshop uban ang madasigong kakugi maoy mipatigbabaw sa duwa.

Sa laing aksiyon, miratsada na sab ang Igot Trucking aron mohakot og laing daog batok sa Rulls Home Bakeshop sa iskor nga 80-78.

Ang anak ni team owner Junax Igot nga si Renren maoy bida sa Igot Trucking dihang iyang gipangulohan ang mainitong rally sa himalatyong oras pinaagi sa duha ka triples alang sa iyang 10 puntos, apan si Paradillo maoy nangu sa kadaugan sa iyang 29 puntos.

Gisuportahan sab ang maong torneyo nilang Rolly dela Pieza, Alan Yu ug sa JB Sportswear ni Billy Nadado. (BANATSPORTS)