Banal, Concepcion fight preview

Nagpahibalo si  ALA Promotions president Michael Aldeguer nga ang series sa libreng video showing himuon sa mga piniling kabarangayan sa mga siyudad sa Sugbu ug Mandaue, lakip na ang Lahug, Talamban, Guadalupe ug mga dagkung barangays.

Ang video shows naglakip sa previous nga mga away ni World Boxing Organization (WBO) Asia Pacific Youth super flyweight champion AJ “Bazooka’ Banal ug World Boxing Council (WBC) Fecarbox super flyweight champion Rafael ‘Little Bull’ Concepcion.

Ang first leg ning maong kalihukan sugdan karong adlawa diha sa Barangay Ermita, ang balwarte ni Banal. Sugdan kini sa alas-8:00 sa gabii diha sa Ermita Sports Complex.  Ang mosunod nga mga binyu ipahibalo sunod semana.

“The program will allow AJ Banal to touch base with their neighborhood friends and fans in different barangays and give them a preview on the fighters’ prospective opponents in the upcoming boxing event on July 26,” matud ni Aldeguer.

Sa maong boxing promotion nga giulohan og “Laban Na Banal,” si World Boxing Association (WBA) No. 3 nga si Banal moharong sa No. 6 nga si Concepcion sa gipaabot nga engkuwentro alang sa bakanteng WBC super flyweight title.

Sa supporting main event, duha ka regional conquerors nga sila si WBO Asia Pacific champion Milan Melindo ug WBA triple regional title holder Shanghai Melo, mag-ilog sab alang sa bakanteng WBA Intercontinental minimumweight title.

Ang mga tiket nagkantidad og P150 sa general admission, P300 sa upper box, P500 sa lower box, P750 sa ringside, P1,500 alang sa  lower box/VIP ug VIP 4th row, P2,000 sa VIP 3rd row, P2,250 sa VIP 2nd row ug P2,500 sa VIP 1st row.

Ang mga tiket mapalit sa Marfori Bakery sa Ibabao, Mandaue, Islands Souvenirs ug Bisaya Boutiques sa SM City-Cebu ug sa Ayala Center-Cebu, ALA Gym sa Banilad Town Center ug Pandelicious sa F. Llamas St. sa barangay Punta Princesa.

Alang sa ticket reservations, tawag sa 346-3489 ug mahimo sab nga mobisita sa secretariat office sa 2/F Bldg A, ALAGC Compound sa Nasipit, Talamban, Cebu.

Ang “Laban Na Banal” nga himuon karong Hulyo 26 diha sa Cebu Coliseum gipadagan sa ALA Promotions, ABS-CBN Sports ug Golden Boy Promotions.