Banat ( Leaderboard Top ), pagematch: 1, sectionmatch: 1

Phil Jackson moretiro na?

CEBU, Philippines - Kun si Los Angeles Lakers head coach  Phil Jackson lang maoy pabut-on, gusto na gyud siyang moretiro gikan sa iyang lisud hitupngan ug mabulokong NBA coaching career. Apan ang Lakers malaumon nga mausab pa ang iyang huna-huna sunod semana.

Matud pa sa 11-time NBA champion coach niadtong Miyerkules nga naglaraw na siyang moretiro nga may kalabotan sa kahimtang sa iyang panglawas ug iya nang pahibaw-on si LA Lakers team owner Jerry Buss human unya sa iyang medical exam sunod semana.

Ang 64-anyos nga si Jackson maoy labing malampusong coach sa kasaysayan sa NBA halos sa tanang mga aspeto diin aduna siya’y .705 winning percentage sa regular season, may record nga 225 ka daog sa post-season ug labaw'g duha ka titulo kang Red Auerbach sa Boston Celtics.

Wala mosalmot si Jackson sa "victory parade" sa Lakers niadtong Lunes didto sa downtown sa Los Angeles tungod kay nagpa-check up. Nasayran, si Jackson may gipamati sa sakit sa tuhod ug sa kasingkasing.

Buot sa Lakers nga magpabilin si Jackson alang sa sunod season. Ang laraw ni Jackson nga moretiro nakapalibog sa Lakers kay bisan ang ilang general manager nga si Mitch Kupchak walay ideya kun unsa gyu’y hukom ni Jackson.

Nasayod si Kupchak nga lisud ang paghulip sa puwesto nga biyaan ni Jackson isip coach tungod sa iyang abilidad. Matud ni Kupchak nga magpaabot siya kun unsay hukom ni Jackson.

Matud ni Jackson nga ang iyang laraw pagbiya sa Lakers walay kalabotan sa kuwarta o dili sa ingon nga wala na siya maka-uyon sa Lakers. Adunay mitumaw nga hungihong nga naglaraw ang Lakers nga paubsan ang suweldo ni Jackson human lang siya makadawat sa labing daku nga coaching contract sa natad sa basketbol diin nidawat siya’g $12 million napun-an pa'g $2 million nga bonus tungod sa pagdaog sa korona sa miaging semana.  – BANAT NEWS

  • Follow Us: