Garces Team 3-0 sa Siba open

CEBU, Philippines - Mikulit sa ilang ikatulong sagunson nga daug ang Garces Team human ilang gipukan ang Artville sa iksor, 97-86 samtang naka-ipsot gikan sa kulba-hinam nga duwa ang Maningo Team batok sa Gerali Team, 109-102 alang sa una nilang daug kaniadtong Biyernes sa gabii atol sa nagpadayong San Isidro Basketball Association (SIBA) Open basketball tournament didto sa barangay San Isidro open court sa dakbayan sa Talisay.

Ang Garces Team pabiling wala’y pilde ug adunay 3-0 nga baraha.

Si Eugene Abapo miposa og 21 puntos alang sa Garces kinsa nagkaduol na ang tsansa nga mo-abante ngadto sa Magic Four sunod Biyernes atol sa pagtapos sa single round robin elimination.

Si Samson Epili maoy nangu sa Artville human siya moburak og 25 puntos samtang laing duha ka kauban ang miamot sab og double figures.

Sa laing duwa niadtong gabhiona, midaug ang Maningo Team ni coach Kenneth Maningo kinsa mao sab ang presidente sa SIBA. Mao lang kadto’y una nilang daug sulod sa duha ka duwa apan bisan pa sa ilang 1-1 nga baraha daku gihapon sila’g kahigayonan nga mosulod sa magic four ilabi na kung modaug sila karong gabii batok sa Greenville team aron mahimong 2-1 ang ilang record.

Ang kanhi CIT Wildcat nga si Ramil Aniñon mibahug og 36 puntos aron pangulohan ang Maningo Team samtang si Maningo mismo mihakot sab og 27 puntos.

Si Arnold Bacus maoy nangu sa Gerali Team pinaagi sab sa iyang 36 puintos samtang sila si Ronald dela Peña ug Tata Debalucos midugang ug 24 ug 23 puntos matag usa.

Pareho na karong naghupot og 1-2 win-loss nga baraha ang Gerali ug Artville.

Puntos matag usa:

First Game:

Garces Team (97)— Abapo 21, Arcele 17, Suico 14, Candol 12, Gonzaga 10, Detuya 9, Garces 6, Delos Reyes 4, Garces 4

Artville (86)— Epili 25, Bacaltos 19, Dejan 15, O. Alegado 10, Omambac 4, M. Alegado 4, Alcontin 3

Second Game:

Maningo Team (109)— Aniñon 36, Maningo 27, Baliguat 22, Aliponga 8, Gentapa 6, Villa 4, Bacus 2, Pasigay 2, Cabañero 2

Gerali Team (102)— Bacus 36, Dela Peña 24, Debalucos 23, Deiparine 11, Becoy 4.   –  BANAT NEWS