Banat ( Leaderboard Top ), pagematch: 1, sectionmatch: 1

Chazyl Mae milubong sa D' Venci sa goodwill game didto sa Naga

CEBU, Philippines - Si Chazyl Mae team owner Tata Llaguno miposa og upat ka triples alang sa kinatibuk-an niyang 16 puntos aron pangulohan ang iyang koponan pag-iskor og 96-77 nga kadaugan batok sa D’ Venci team sa usa ka exhibition game niadtong Biyernes didto sa barangay Tangke, Naga, Cebu.

Si Llaguno, kinsa mibukas sa duwa og 3-0 nga labaw nakigtabla kang Rene Toring miposa sab og 16 puntos, apan ang UV Lancers’ reserve nga si Janno Nuñez maoy nangu sa Chazyl Mae pinaagi sa iyang 18 puntos. Si Alfred Belande, kinsa wala makaduwa sa CESAFI tungod sa academic deficiency miamot og 11 puntos.

Sila si Jimwell Torion ug Leo Bat-og nga pulos niduwa sa PBA kaniadto maoy mipalig-on sa kampo sa Chazyl Mae ni coach Mark Anthony Tallo. 

Taudtaud unang naka-inat sa ilang labaw ang Chazyl Mae tungod kay wala man sab magpalupig ang D’ Venci, apan dihang nagsugod na sila og pamuntos mikiat na sila og maayo.

Human pabuthi og 15-2 sa Chazyl Mae, ang D' Venci ni Naga municipal councilor Venci del Mar wala na makarekober.

Si Danny de los Santos maoy nangu sa D’ Venci sa iyang 13 puntos, sila si Aldrin Ocañada, Jared Kane Abatayo, Wilbert Sayson miamot og 12 puntos matag usa, samtang sila si Felix Duhig ug Jerry Jaca nagkumboya og 17 puntos sa maong kapildihan.

Sa laing bahin, himuon karong Septiyembre 4 ang final showdown sa Tangke Officials League diin ang Hans nga unang nakakuha og luna sa finals magpaabot na lang sa modaog sa duwa tali sa Crossing ug Taiko.   (Gabby G. Malagar) (BANAT NEWS)

  • Follow Us: