Banat ( Leaderboard Top ), pagematch: 1, sectionmatch: 1

Cobras vs. Panthers sa Partner's Cup

CEBU, Philippines – Paningkamotan sa Hotel Fortuna/SWU Cobras nga mapanalipdan ang walay pilde nilang rekord sa ilang pakigharong batok sa CDO Idol Cheesedog/USPF Panthers karong adlawa sa pagpadayon sa 3rd CESAFI Partner's Cup basketball tournament diha sa Cebu Coliseum.

MGA DUWA KARON

(Cebu Coliseum)

5:00 pm -- CDO Idol/USPF vs. Hotel Fortuna/SWU

6:30 pm -- Ave Maria/USJ-R vs. Prime Asia/UV

Ang SWU Cobras temporaryo karong nahimutang sa kinatas-ang dapit sa ilang 3-0 nga baraha, apan seguradong dili nila madali-dali og tumba ang USPF Panthers, kinsa mipukan sa Ave Maria Sanctuary Park/USJ-R Jaguars sa iskor nga 75-67 niadtong miaging semana.

Laing kulbahinam nga duwa diin magsangka ang mga banggiitang Prime Asia/UV Lancers ug Ave Maria/USJ-R nga maoy main game nga gikatakda sa alas-6:30 sa gabii.

Niadtong Pebrero 1 maoy adlaw sa mga underdogs tungod kay gipakuratan sa Panthers ang Jaguars, 75-67, samtang gilubong sa Enervon/UC Webmasters ang UV Lancers sa iskor nga 90-73.

Ang Lancers ug Jaguars parehong nagkupot og 1-2 win-loss records.

Ang Panthers mag-atubang na sab og dakung tahas kun unsaon nila pagpitol ang bangis nga Cobras. Ang Panthers nahimutang karon sa ikaduhang dapit uban sa Webmasters sa managsamang   2-1 nga baraha.

Daw anaa pa karon naglutaw sa kawanangan, ang Cobras mosandig sa ilang mga starting unit nga naglakip nila ni Eric Zanoria, Alfred Belande, Clifford Maguate, Gilbert Gallarde ug Aard Diango, samtang ang Panthers langkuban nilang Elvis Labares, Randy Colonia, Edison Rivera, Elwin Durano ug Mike Sereño.

Sa laing bahin, dili pa maseguro kun makaduwa ba si Slaughter karon uban sa Lancers gumikan kay atua man kini nanikaysikay sa RP Team training pool. Mowadwad sa Lancers mao sila si Edrian Lao, Eman Calo, Bonifer Sendrijas, Ralph Olivares ug Ritchum Dennison.

Ang Jaguars magsalig gihapon nilang Armand Ponce, Jabe Delfino, Ranulfo Malinao, Edwin Bibera ug sa rookie niining si Kurt Amores. BANAT NEWS

  • Follow Us: