Lima ka CESAFI teams moapil kumbati sa 3rd VAAA caging

CEBU - Usa ka dosenang teams -- lima niini gikan sa Cebu Schools Athletic Foundation, Inc. (CESAFI) ang nagpanikad na nga mokumbati sa ikatulong season sa Visayas Amateur Athletic Association (VAAA) men's basketball tournament nga gikatakdang mosikad karong Nobiyembre 22 diha sa Cebu Coliseum.

Mangu sa entranteng koponan gikan sa CESAFI mao ang gikaintapang defending champion University of the Visayas (UV) Green Lancers.

Makig-uban sa Lancers mao ang University of San Jose-Recoletos (USJ-R) Jaguars, University of San Carlos (USC) Warriors, Southwestern University (SWU) Cobras ug ang Don Bosco College (DBC) Greywolves.

Ang partisipasyon sa CESAFI teams sukwahi sa CESAFI Board resolution nga nagdili sa mga miyembro niining tunghaan pag-apil sa VAAA.

Apan si USC Warriors head coach Jay Ramirez nagkanayon nga segurado na silang moapil sa liga nga gitukod ni legendary Cebuano coach ug tinamod nga league organizer nga si Raul 'Yayoy' D. Alcoseba.

"Apil gyud mi," matud pa ni Ramirez human sa ilang tigum nga gipatawag ni Alcoseba kagahapon didto sa Yayoy's Grill and Resto Bar. "Ang ako lang magkahiusa na unta ni sila. Kami, moapil mi sa bisan unsang tournament basta dili lang conflict sa CESAFI. Ang akong mga players gusto kaayong moduwa. Mas daghan nga tournament, mas maayo nga exposure sa ilaha."

Ang USC Warriors naapil sa Bracket-A uban sa UV, Asian College of Technology (ACT) Cyber Knights, University of Bohol (UB), Western Leyte College (WLC) Mustangs sa Ormoc ug Asian College of Science and Technology (ACSAT) Lightnings sa Dumaguete.

Ang USJ-R, SWU ug Don Bosco nabutang sa Bracket-B uban sa Salazar Colleges of Science and Institute of Technology (SCSIT) Skyblazers, Bohol Institute of Technology-International College (BIT-IC) ug AMA Computer College sa Ormoc.

Sa season-opener, ang SWU makigharong batok sa SCSIT sa alas 3:00 sa hapon, samtang ang ACT makighamag batok sa USC sa main game sa alas 4:30 sa hapon.

Sa dili pa ang mga duwa, usa ka simpleng seremonyas sa pagbukas ang ipahigayon nga pagatambongan ni SBP president Manny V. Pangilinan ug executive director Jose Emmanuel 'Noli' Eala.

Si VAAA commissioner Jose 'Boy' Murillo nagkanayon nga ang torneyo magsubay og single round robin format diin ang top two teams matag bracket moabante sa crossover semifinals. Ang mga mananaog maoy mag-engkuwentro alang sa kampiyonato sa usa ka "best-of-three" series. – BANAT NEWS