Banat ( Leaderboard Top ), pagematch: 1, sectionmatch: 1

USJ-R, SWU  2-0 sa La Fortuna Cup

Nakatangag na og duha ka daog ang University of San Jose-Recoletos (USJ-R) Jaguars pinaagi sa paghambat  sa Salazar College-Salazar Institute of Technology (SC-SIT) Skyblazers sa iskor nga 114-109 sa nagpadayong aksiyon sa La Fortuna Cup basketball tournament kagabii didto sa Cebu Coliseum.

Sa maong kadaugan, ang Jaguars nakigsawo na karon sa liderato uban sa Southwestern University  (SWU) Cobras sa managsamang 2-0 win-loss records.

Ang Jaguars wala gyud mopakita'g kaluya  bisan og gisigihan kini'g  hasmag  sa Skyblazers hangtod nga si Gilbert Violango Jr. mitusak og three point shot  sa nahabiling 46 segundos nga nakapasikit sa iskor, 100-104. Apan ang mga tang-an sa Jaguars nga  sila si Luther Justiniani ug Manny Gabas mipasulod  og  mahinungdanong  puntos pinaagi sa ilang  free throws sa daginutong segundos sa duwa.

Si Justiniani maoy nangulo sa opensa sa Jaguars nga adunay 23 puntos, samtang si Bobby Hatague milansang og 20 puntos. Si Gabas igo lang naka-iskor og otso puntos apan daku kini'g natabang sa himalatyong oras sa fourth quarter.

Ang Skyblazers nga  wala kaayo makapahimulos sa serbisyo sa ilang guwardiya nga si Jun Gabica tungod sa nahiagomang gisi sa walang bahin sa iyang kilay gipangulohan ni Violango kinsa mibugha og 26 puntos, samtang si Benjie Calma miligwat  og 21 puntos.

Sa laing bahin, ang SWU Cobras mitukob sab  sa ikaduhang sunod-sunod nga daog niadtong miaging gabii pinaagi sa pagbuntog sa University of San Carlos (USC) Warriors sa iskor nga 90-84 didto gihapon sa Cebu

Coliseum.

Si Elliud Poligrates, kinsa pikhan usahay ni coach Dodie Miego tungod sa iyang fancy dribbling maoy nangulo sa Cobras sa iyang 21 puntos ug ang iyang partner gikan sa Danao City nga si Eric Zanoria mikanlat og 19 puntos.

Sila si Clifford Maguate ug Alfred Belande, nga pulos magduduwa-kanhi sa University of Southern Philippines Foundation (USPF) Panthers nakatampo sab og daku sa kadaugan sa Cobras pinaagi sa ilang crucial baskets sa katapusang kuwarter.

Ang  pilderong Warriors gipangulohan ni Niño  Ramirez, kinsa mikimada og 16 puntos.

Ang La Fortuna Cup gipaluyohan sa Hotel Fortuna, La Fortuna Bakery, Pepsi Cola ug Nature's Spring.

  • Follow Us: