Replay ng Barangay Ginebra at Talk N Text

Siguradong magiging emosyonal ang muling paghaharap ngayon ng Barangay Ginebra at Talk N Text sa replay ng kanilang nabalewalang double overtime game na napanalunan ng Ginebra.

Muling magku-krus ang landas ng Gin Kings at ng Phone Pals sa alas-6:30 ng gabi sa Araneta Coliseum sa espesyal na laro ng Samsung PBA All-Filipino Cup.

Ang larong ito ay ipinag-utos ni PBA Commissioner Noli Eala nang kanyang sang-ayunan ang protestang inihain ng Phone Pals.

Inireklamo ng Talk N Text ang buzzer beating basket ni Paul Asi Tau-lava sa unang overtime na sana’y nagkaloob sa Phone Pals ng panalo at di na umabot pa sa ikalawang overtime ang laro kung hindi binalewala ng mga referees ang game-winning basket.

Nagkaroon ng imbestigasyon at natuklasan ni Eala na nagkaroon ng teknikalidad na siyang dahilan para ma-nulify ang laro at pagka-looban ng replay. (Ulat ni Carmela V. Ochoa)