Banat ( Leaderboard Top ), pagematch: 1, sectionmatch: 1

Tomas: South dist. o Cebu city hall

Na-sandwich karon si Kongresista Tomas Osmeña sa duha ka politikanhong sitwasyon nga kinahanglan niyang atubangon sa 2013 nga eleksiyon.

Una niyang sagubangonon ang pagpasubli ni Mike Rama isip mayor sa siyudad sa Sugbo. Tinguha ni Tomas nga mailog og balik ang City Hall gikan sa wala niya mauyoni nga dinad-an ni Mike.

Kun lain ang palansaron batok kang Mike, seguro man nga mapilde mao nga si Tomas mismo ang midesisyon nga modagan batok kang Mike.

Apan samtang dako niyang tinguha nga moatbang sa kanhi niya alalay, maglisod siya sa pagpabiya sa iyang mga mata sa pagtan-aw sa south district diin mahimutang ang South Road Properties (SRP).

Samot na nga si Tony Cuenco mipatim-aw na sa iyang pakig-alyado kang Mike, mura og naglisod karon si Tomas sa pagtimbangtimbang unsay iyang unahon, ang City Hall o ang south district?

Sa page 1 sa The Freeman kagahapon, maklaro ang kabalaka ni Tomas nga makabalik si Cuenco sa south district.

Sa maong isyu, nakita nako nga gilig-onan pa gyud si Tomas kang Cuenco kay nangunay man gyud kini og kumbinser sa mga tawo nga si Cuenco dili makadepensa sa SRP.

Apan samtang nagsige siya og bantay sa south district, mag-aburido ang iyang hunahuna sa mga sitwasyon karon nga ang mga negosyante nagkahiusa sa pagsuporta kang Tomas. Tiaw mo na, ang mga negosyante nag-fundraising aron ipanindot sa Osmeña Boulevard, taliwala sa pagbabag sa mga konsehal nga alyado ni Tomas sa Bando Osmeña Pundok Kauswagan (BOPK) nga malutsan og mga pundo ang mga proyekto ni Mike.

Ang mga tigpaniid sa politika sa siyudad nagkanayon nga bawot-bawot ang panagsakbang ni Tomas ug Mike sa pagka-mayor sa siyudad.

Sumala pa sa mga guwang-guwang na, makadaog man tuod si Tomas, apan panington gyud kini pag-ayo tungod kay nagkalig-on si Mike, samtang nabuak na usab ang BOPK ug ang pipila ka sakop niini mikuyog na sa panon ni Mike.

* * *

Kun hingpiton ni Tomas iyang desisyon pag-ilog og balik sa iyang lingkoranan nga karon gilingkoran ni Mike, kinsa man iyang padaganon sa south district aron protehian niya ang iyang interes sa SRP?

Kun si Margot bawot-bawot ra ba kaha silang Cuenco?

Apan adunay laing materyal nga nagsige na sa iyang konsultasyon sa mga botante sa south district. Si Totol Batuhan nagtuyoktuyok na sa mga barangay sa habagatan.

Niadtong Sabado, si Totol kauban ang Abante Barangay Movement, Philippine Coast Guard, mga batan-on, senior citizens ug mga opisyal sa mga coastal barangays nanglimpyo sa kabaybayonan sa Pasil ug Suba.

Human sa panglimpyo, gihimo ang usa ka programa sa Pasil Sports Complex diin gilusad ang facebook page sa movement nga gipanguluhan ni Totol.

Pananglit, modagan si Totol batok kang Cuenco, bawot-bawot ba?

* * *

Si Atty. Vitaliano Aguirre nakakaon og tagam sa iyang pag-insulto kang Senator-Judge Miriam Defensor Santiago pinaagi sa pagsap-ong sa iyang mga dunggan samtang nag-lecture ang senadora ngadto nila nga mga sakop sa prosekusyon sa impeachment trial ni chief justice Renato Corona.

Gi-contempt ang abogado tungod sa iyang gibuhat nga wala ma-uyoni sa mga senator-judge.

Dili angay buhaton ni Aguirre ang pag-insulto sa mga hurado. Mahimo ra man unta kadtong dili siya maminaw bisan sa kataas sa tingog sa senadora.

Siya na hinuon ang nag-antos kay gusto man ni Miriam nga ipapriso siya og usa ka adlaw sa Senado isip silot sa direct contempt of court.

Apan sa laing bahin, nagbunga usab ang iyang gihimo tungod kay sa tanang abogado ug kongresista nga naglangkob sa prosecution team, siya ra man ang nakasukol kang Miriam nga kanunay’ng magwala sa hawanan, mangasaba kanila ug mag-lecture ug maghingalan nila og dili mao.

Samtang tinuod nga ang mga huwes maoy hawod sa ilang korte, apan gitugot usab sa Rules ang panag-respetoay.

Si Miriam, sukad sa sinugdanan, walay respeto ngadto sa mga kongresista nga kun makapangasaba mura’g iyang mga boy ug maid.

Ang ubang suhito sa balaod nakapangutana kun apil ba sa Rules sa impeachment trial ang pagpangasaba ngadto sa mga abogado sa prosekusyon o depensa ug paghingalan nila og “gago” ug uban pa?

Apan makahibulong kaayo kay bisan samok na kaayo paminawon si Serafin Cuevas nga magsige og object ug ang iyang mga kaubanan nga abogado, dili man kasab-an ni Miriam.

Ang mga abogado giisip nga “officer of the court” sama sa mga huwes, busa kinahanglan gihapon sila respetohan.

Mahimo man nga mag-lecture taliwala sa hawanan sa Senado si Miriam, apan dili kana buot ipasabot nga apilan og pangasaba, panghingalan og dili mao ug pagminaldita.

Dili tingale mabuhat ni Aguirre ang pag-insulto kaniya kun wala pa usab siya magpunay og pang-insulto kanilang mga abogado.

Sa inengles pa, “respect begets respect” nga sa ato pa, kun nagrespeto pa unta si Miriam sa mga abogado sa prosekusyon, respetohan usab siya.

Apan ang wala mahibaw-i ni Miriam gihimo ra siyang sentro sa bugalbugal sa mga Pilipino sa gipakita niyang lihok nga dili lihok sa normal nga tawo.

  • Follow Us: