Endangered species
PAMBANSANG hayop? Kalabaw pero may nagsasa- bing Tamaraw. Pambansang ibon? Philippine Eagle (Haribon) ngunit may namimilit na Maya raw. Grade 1 pa lang ay dinidikdik na ito sa kaisipan ng mga musmos sa sibika o araling panlipunan. Sa ating mga amoy lupa na, karaniwan ang nalilito o hindi maalala kung ano ang mga pambansang simbolo.
Malapit nang mabura ang problema dahil ayon sa Department of Environment and Natural Resources (DENR), ang Haribon at ang Tamaraw ay nagbibilang na lang ng araw. Ang mga hayop na ito na pawang mga endemic o dito lang matatagpuan sa Pilipinas ay opisyal nang naisama sa listahan ng “critically endangered species” o mga uri ng hayop na dahil sa kakaunting natitirang bilang ay nanganganib na tuluyan nang mag-laho sa mundo.
Kamakailan ay napabalita ang pagbaril sa isa sa mga Haribon, si Kagsabua (Unity) na mino-monitor ng Philippine Eagle Foundation. Ito’y napatay at ginawang pulutan ng isang magsasaka sa Bukidnon. Tinatayang aabot 250 na lamang ang natitirang Haribon sa kagubatan. Kaya’t ang mga ito at lahat pa ng tinuturing na endangered ay pinuproteksyunan ng batas sa pamamagitan ng pagpapataw ng parusa. Ang nahuling suspect ay kakasuhan ng DENR at kapag mapatunayang nagkasala ay maaring makulong ng hanggang 12 years at magbayad ng P1 million na multa!
Ang Pilipinas ay pinagpalang mabigyan ng katakut- takot na iba’t ibang uri ng likas yaman. Hindi pa man napapakinabangan nang husto’y heto na ang mga signos na mauubusan na tayo ng panahon. Kailangan nating pangatawanan ang tinakdang batas laban sa mga walang pakundangang naninira rito. Ito lamang, kasama ng isang magandang educational campaign, ang paraan upang maipaglaban ang yamang ito. Mabigat nga ang parusa subalit mas mabigat dalhin ang isang mundong kinalbo na ng likas yaman.
May kasabihan na hindi natin pag-aari ang kamunduhan. Ito’y pansamantalang pinapahiram at pinaaalagaan sa atin para sa kapakanan ng susunod na henerasyon. Kung hindi tayo mumulat sa ating lambong, magigising na lang tayong wala nang maipapamana sa ating mga anak.
- Latest
- Trending