Banat ( Leaderboard Top ), pagematch: 1, sectionmatch: 1

Ang cybersex sa Cordova

Tungod kay gipasagdan lang ni Mayor Adelino Sitoy ang suliran sa Cyberpornography sa iyang lungsod, miabot na gyod ang panahon nga ang mga ginikanan na sa mga bata sa iyang lungsod ang mibugaw niini ngadto sa mga langyaw nga kustomer atubangan sa computer.

Kung wa pa rondaha sa mga sakop sa National Bureau of Investigation kaniadtong petsa uno ning buwana ang panimalay sa usa ka magtiayon sa Barangay Ibabao sa lungsod sa Cordova sa lalawigan sa Sugbo diin nasakpan sa akto ang mga ginikanan nga maoy misugnod sa ilang lima ka mga minor de edad nga anak ug usa ka pag-umangkon, di gyod unta mahibaw-an sa hingpit ang negosyong pornograpiya sa lungsod sa Cordova.

Bisan og gipahibawo na sa Provincial Womens Commission ang buhatan ni Mayor Adelino Sitoy mahitungod sa Cyberpornography sa iyang lungsod ug bisan pa sa pagsumbong sa mga lumulopyo sa Barangays Ibabao, San Miguel, Cogon ug Day-as ngadto ni Mayor Sitoy ug kapolisan, ang nahisgutang mga otoridad wa gyod magpakabana tungod sa rason nga ang krimin gihimo sa sulod sa mga pribadong panimalay ug ang mga police naglisod sa paghipos og mga ebidensiya nga magamit sa pagdangop sa hukmanan aron pangayoon ang search warrant.

Tungod sa nahitabo sa iyang lungsod misuway unta sa paglusot si Sitoy. Iyang giingon nga wa siya masayod sa cyberpornography operation pero gisupalpal siya ni Bise Gobernadora Agnes Magpale. Giwara-wara sa Bise Gobernadora ngadto sa mga sakop sa media ang iyang suwat nga nadawat sa buhatan ni Mayor Adelino Sitoy kaniadtong Septyembre 3, 2010 nga nag-awhag sa mayor sa pagsusi ug pagsilot sa mga tawong nalambigit sa Cyberpornography operation sa iyang lungsod.    

Ang palusot sa police sa Cordova wa usab magsilbi sa mga sakop sa National Bureau of Investigation nga nakahimo sa pagronda sa pribadong panimalay nga gihimong cybersex den sa tag-iya nga nagpuyo niini.

Nganong wa tagda ni Mayor Adelino Sitoy ug mga police ang cyberpornography sa Cordova? Tungod ba kay sila ang nagpadagan o ba kaha protektor sa mga nagpadagan niini? Wa ko mamasangil, nangutana lang.

Seguro wa lang makabantay si Mayor Adelino Sitoy sa nagkatag nga cyberpornography sa iyang lungsod tungod kay na-busy siya sa iyang opisina sa Casino ug Ballroom dancing matag Martes, Huwebes ug Domingo sa Waterfront Mactan. Tinuod ni Mayor?       

  • Follow Us: