Tihik sa text

Kun sama nako tihik ka ug nagsige og pangita libreng mga paagi sa komunikasyon ginamit ang labing bag-ong mga teknolohiya, para ni nimo. Kun di kang kasabot nganong may mga tawo nga sama nako nga magsige og pangita og bag-ong mga paagi sa pagdaginot, palihog basaha gihapon ni. Bisan aron na lang mahibawo unsay mga libre nga wa nimo mapahimusli.

Di ni ilad. Personal ni nakong kasinatian. Makapada ka og labing menos 50 ka text messages nga libre matag adlaw ngadto sa imong mga paryente ug higala. Di sila kinahanglang motubag aron makapada ka og laing text messages. Kun motubag sila, madugangan pa gyud ang imong quota.

* * *

Bugtong nimong gikinahanglan mao ang account sa Gmail, ang web-based nga libreng email application nga gipanag-iya sa higanteng search company, ang Google. Di kinahanglan nga duna kay mobile phone. Ni numero sa telepono. Naapil ang Pilipinas sa pipila pa lang ka nasud, apil nang Estados Unidos, nga makapahimus sa libreng SMS service sa Gmail.

Duha pa hinuon ka kompaniya sa telepono sa Pilipinas ang katambayayong sa Google ning bag-o nilang proyekto, ang Smart ug ang Sun, nga pulos na karon gipanag-iya sa higante nga Philippine Long Distance Telephone Co. (PLDT). Wa pay katin-awan nganong wa maapil ang Globe.

* * *

Nakauna pagtanyag sa libreng text messages gikan sa email ang Yahoo! Mail, nga mas daghan og users dinhi sa Pilipinas kay sa Gmail. Mas una pa gyud gani nga nitanyag ini ang Chikka.com. Apan kinahanglang motubag ang imong gipadad-an og text messages sa Yahoo! ug Chikka aron makapada ka og dugang mensahe.

 Kun motubag ang imong gipadad-an og text message sa Gmail SMS, P1 ray iyang bayran, mas ubos sa P2.50 sa Chikka. Madugangan pa gyud og lima ka text messages ang imong inadlaw’ng quota nga 50. Sa ato pa, kun magsige og tubag ang imong ka-text (kay P1 matag text ra may ilang bayran), pamaolan ka na lang di pa mahurot ang imong libreng SMS.

* * *

Mapuslanon ni sa dinaliang text messages nga kinahanglang ipada sa mga higayon nga mahutdan kag load. O kun text messages ang gisaligan sa imong negosyo. O alang sa DYAB Abante Pa, Bisaya! nga magpada og libreng SMS news updates sa iyang mga tigpaminaw.

 Pilay imong madaginot? Labing menos P50 matag adlaw. Sa matag Gmail account. Sa kataposan nakong pakisusi, way limitasyon nga gipahamtang ang Google sa gidaghanon sa Gmail accounts nga imong mamugna. Kun dunay 100 ka Gmail accounts, labing menos 5,000 ka libreng text messages ang mapada matag adlaw.

Sa di pa diay ko malimot, palihog ayaw ni’g ipanabi. Kun manakod ang atong katihik, tingalig usbon sa Google ang ilang business model.

Email: mailto:[email protected]