Armas walay lisensya

Nakapanglingo-lingo g’yud ko dihang ang property custodian sa Cebu City Hall mitug-an namong mga reporters nga daghan sa mga armas nga mobuto nga iya sa dakbayan wala na mabag-o ang lisensya.

Paita uy. Imbis ang kagamhanan mao unta ang magsilbi nga ehemplo ngadto sa publiko mao na hinoon ang nagpasig-ulo sa dili maayo nga kalihukan.

Gisukna namo si Mayor Michael Rama kun unsay iyang himoon, kun iya ba nga bawion ang maong mga armas nga giisyu ngadto sa mga opisyal sa City Hall, mga barangay opisyal ug kawani sa City Hall.

Sa laktud nga tubag walay plano si Rama nga bawion ang maong mga armas. Giklaro usab ni Rama nga wala sila mag-isyu sa armas aron nga dala-dalaon kini sa mga hingtungdan.

Saba diha uy! He! He! Unsa man diay buot ipasabut nimo Mayor Rama nga ang armas kutob ra g’yud diha sa hunos sa mga lamesa sa mga opisyal ug kawani sa kagamhanan nga giisyohan? Tell that to the dead marines!

Dili igo nga moingon ka lang nga basta kay ang armas wala kamo motugot nga dad-on sa tawo nga imong gipaisyohan. Ang tinuod, ang angay’ng isyohan og armas mao ang naghupot og kwarta sa kagamhanan.

Apan karon ang treasurer wala na man kaayo maggunit og kwarta kay automated teller machines na man ipaagi ang sweldo sa 4,700 ka kawani sa City Hall. Ang armas unta anha ra kutob sa ilang mga hunos sa lamesa.

Ang pamahayag ni Engr. Rolly Ardoza nga maoy hepe sa General Service Office (GSO) nga gipangayoan nila og gun safety certificates ang mga giisyohan og armas dili pa kini igo.

Karon, nahibaw-an nako nga sa 507 ka armas sa dakbayan sa Sugbo, ang 214 ra niini ang lisensyado apan mo-expire na usab kini karong Marso 23. Hala, dalia ninyo pagpa-renew daan Sir Rolly.

Ang ubang armas walay lisensya apan ang 183 niini giisyu gihapon sa mga opisyal ug ubang mga kawani sa City Hall. Kun mahitabo nga makapusil? Unsay mahitabo?

Ang tukma unta nga buhaton sa taga GSO mao nga pangayoan g’yud og tukmang mga papeles kadtong mga tawo nga isyohan nila og armas kun gitugotan ba sila sa Camp Crame nga makadala og armas.

Ang pagpirma sa mayor mao ra ang pag-aprobar sa “Letter Request” sa hingtungdang kawani nga sila kaisyohan og armas, apan kinahanglang motuman gihapon sila sa balaud.

Sayop usab ang giingon sa uban nga ang mga kapitan gitugotan pagdala og armas basta anha ra sa ilang barangay. Ang balaud nagkanayon “The barangay captains are authorized to carry firearms within their territorial jurisdiction while in the performance of their duties, but subject to appropriate rules and regulations.”

Unsa man ang gipasabut nga “rules and regulations?” Kini mao ang lagda nga gilatid sa Firearms Law nga kinahanglan nga kadtong gusto nga mohupot og armas, 1) ang armas lisensyado, 2) ug ang tawo nga modala niini may pagtugot sa kadagkoan sa kapolisan.

Dunay lima ka matang sa lisensya sa armas ug ang armas nga iisyu ngadto sa usa ka local government unit sama sa dakbayan sa Sugbo maoy gitawag og Long Certificate of Registration, dili Regular License sama sa pagtoo sa uban.

Kun ang kawani o opisyal sa City Hall gustong modala-dala sa armas nga giisyu kaniya, dili lang kay diha ra sa hunos, angay siya nga mokuha og short certificate of registration o mahimo usab nga Permit to Carry Firearms Outside Residence.

Daghan pa unta ang angay ninyo nga mahibaw-an apan wa na tay lugar.