Banat ( Leaderboard Top ), pagematch: 1, sectionmatch: 1

Wala ipatuman ang balaud

Nasabut g’yud nako sa tinubagan ni CITOM chairman Sylvan “Jack” Jakosalem nga ang mga traffic enforcers wala mopatuman sa ordinansa nga nagdili sa mga public utility vehicles sama sa PUJ nga mamasahero sa kadalanan sa dakbayan.

Ang Cebu City Ordinance 2072 naglatid nga tanggongon (impound) kadtong mga public utility vehicles nga masakpan katulo nga molapas sa mga lagda sa City Ordinance 1837.

Ang City Ordinance 1837 naglatid nga kadtong mga public utility vehicles sama sa PUJ nga nagbiyahe gawas sa dakbayan sa Sugbo kutob na lang sa mga “accredited terminals” ug dili na tugotan nga mamasahero sa atong kadalanan.

Tumong sa maong ordinansa mao nga maminusan ang gidaghanon sa mga sakyanan nga magdagan-dagan sa kadalanan sa dakbayan sa Sugbo. Atul sa 888 News Forum sa Marco Polo Plaza Hotel kagahapon matud ni Jakosalem nga padayon sila nga nanakop sa mga PUJ nga gikan sa Mandaue City nga milapas sa maong ordinansa.

Apan kun nagsigi pa og panakop ang mga CITOM enforcers sa mga PUJ nga gikan sa Mandaue nga nahurot na unta kini sa pagka-impound. Matud ni Jakosalem nga karong pipila ka adlaw mga Temporary Operators Permit (TOP) na lang ang ilang iisyu sa mga drayber tungod sa wala pagtuman sa traffic signs.

Aw mahimo usab apan nagpasabut nga milingiw na sila sa pagpatuman sa hingpit sa City Ordinance 2072 nga maoy nakapakurog sa mga PUJ operators.

Nasayod ko nga kun paspasan pagpanakop ang mga PUJ drivers nga gikan sa Mandaue nga mosulod ug mamasahero sa atong kadalanan unya TOP ang gamiton, mahadlok gihapon ang mga drayber. Apan wala malilong kanako ang batasan sa mga CITOM enforcers. Lingiw-lingiwan ra nila ang mga PUJ nga nagdala sa rota nga 21-B ug 22-B nga moagi diha sa Osmeña Boulevard.

Mao kini ang nakapaduda nga dunay mga traffic enforcers nga tingali magdawatan og suborno sa mga drayber aron dili sila dakpon.

Mahimo usab nga ang CITOM nakadawat og kamandoan gikan sa City Hall nga dili lang dakpon ang maong mga PUJ gikan sa Mandaue kay dunay hangyo niini si Mayor Jonas Cortes.

Bi asa man g’yud niini ang tinuod nga rason? Kadaghan g’yud ko makabantay nga kun moagi na ang mga PUJ sa Mandaue diha sa dapit nga dunay mga CITOM enforcers, maglingiw-lingiw lang sila.

Aw kun tinuod ang gisulti ni Jack nga wala nila ipahunong ang pagpatuman sa City Ordinance 1837 ug 2072, panid-i Sir kun dakpon ba sa mga enforcers ang maong mga PUJ kun moagi na sa dapit diin sila madistino. Usa si Jack sa midiskutir sa problema sa trapiko kagahapon mao nga nahisgutan ang isyu kun nganong padayon pa ang pagbiyahe sa mga PUJ sa Mandaue dinhi sa dakbayan sa Sugbo.

Ang ako gud nga law-ay kaayo tan-awon nga dunay balaud apan wala kini hingpit nga gipatuman kay dunay gihatagan og pabor. Kun gusto man ang mga opisyal sa dakbayan nga tugotan ang mga PUJ sa Mandaue nga makasulod ug makapamasahero dinhi sa dakbayan, walay problema.

Apan usba usa ang ordinansa ug iklaro nga ang City Ordinance 1837 exempted kon walay apil ang mga PUJ sa Mandaue, aron dili kita mahimong kataw-anan.

Matud pa sa panultihon sa patas nga pagpatuman sa balaud walay magbagulbol, apan kun may gipinig dunay moyamiid ug sa hilom nagdugo ang kasing-kasing sa kahiubos.  

  • Follow Us: