EDITORYAL - Ang "krus" ni Mayor Soc

Nalambigit na usab sa kontrobersya ang sinagop ni Talisay City Mayor Socrates Fernandez nga si Joavan niadtong Biyernes sa hapon. Sama sa gihapon miabot na usab ang mayor aron suportahan ang sinagop.

Gihulagway sa mga polis nga usa ka matang sa paglapas sa balaod ang gihimo sa mayor ug gitinguha karong apilon kini og pasaka og kasong ‘obstruction of justice’ gumikan sa pagkuha niini sa kolor pula nga bag sulod sa Isuzu Big Horn nga gisakyan sa anak nga gituuhan sa kapolisan nga gisudlan sa ebidensya sama sa .45 kalibreng pistola nga giingong gipangtion ni Joavan ngadto sa registered nurse nga reklamante.

Makadaghang higayon nang gihimo kini sa mayor ngadto sa iyang sinagop ug makadaghan na usab angkona sa mayor nga iyaha gyud kining dapigan ug padayong mahalon gumikan kay kung walay mohimo niini sa iyang anak kinsa pamay madaganan sa naulahi.

Giisip niyang usa ka dakong “krus” nga iyang pas-anon si Joavan samtang buhi pa siya. Usa ka maayong amahan si Mayor Fernandez ug pagkabulahan ni Joavan nga nakabaton siya og susama niining ama-ama.

Apan gumikan sa pagkamaayong tawo sa mayor daw pagyaga-yaga na sa pagkatawo niini isip usa ka relihiyosong tawo ug maayong amahan sa dakbayan sa Talisay ang kanunay’ng pagkalambigit ni Joavan sa mga kasamok.

 Kung magsige og ingon niini duna pa ba kahay motuo sa mga ipangwali ni Fernandez kabahin sa mga Pulong sa Diyos nga mismong ang iyang sinagop dili gani mopatuo kaniya?

Hinuon daghan pang mga tawong motuo sa mayor gumikan sa pagkamaayong tawo niini tungod kay gibotaran man gihapon siya sa mga taga Talisay, apan posibleng dakong porsiyento kanila ang kulang sa pagtuong usa ka maayong amahan ang mayor ngadto sa iyang sinagop.

Hangtud kanus-a kaha magpadayon si Fernandez sa pagdapig sa mga kahiwiang nahimo sa iyang sinagop? Hinuon ang kaluwasan sa kalag dili mahimong himuon sa ubang tawo kundili ang kaugalingon lamang, kun duna may maluwas nga kalag sa duha base sa gitudlo sa simbahan, kinsa kaha kanila? Ang nagpapas-an o ang nagpas-an?