Ayaw na mo'g away

Daghan ang wala pa kaayo makatugkad sa balaud mao nga nangreklamo sila kun nganong ang ubang sakyanan nga moagi sa mga police checkpoint dili man pahunongon sa mga polis.

Mahimo baya nga pahunongon sa kapolisan ug ila nga hilngon ang mga sakyanan, apan kana kun duna silay lig-on nga basihanan nga ang maong sakyanan nagdala o kaha gikargahan og mga illegal nga butang.

Mao nga sagad makita sa katawhan nga ang mga motorsiklo ra ang pahunongon sa mga polis kay daghan man god nga mga report nga kining maong matang sa sakyanan maoy gamiton kanunay sa mga kriminal.

Dali ra man god sila nga makasiot-siot mao nga motor ang ila nga gamiton kun mohimo sila’g krimen. Tungod niini, ang kapolisan mihukom nga kun maghimo sila og checkpoint, mga motor maoy ila nga tumong.

Aw kun armas ang idling tumong, sigurado nga makasakop sila og daghang armas gikan sa mga nagsakay og kotse, apan nasayod ko nga sagad niini dunay mga papeles.

Ang tinuod, paglangan-langan ra man god kun apilon pa sa pagsusi sa kapolisan ang mga nagsakay og kotse, ilabi na kun wala sila’y report nga nadawat nga kini gisakyan sa mga dautang elemento.

Sayonan ka, maglumbay tingali ang mga sakyanan ug ang publiko siguradong moreklamo g’yod, apil na kadtong mga nangreklamo kun nganong mga motor lang ang gisusi sa kapolisan.

* * *

Kini bitaw’ng binuang dili g’yod magbunga og kaayohan. Mao kini ang leksyon nga nakuha sa upat ka kanhi kawani sa City Hall nga nasakpan sa paggamit og shabu sulod sa usa ka barung-barong didto sa Dulho-Fatima niadtong 2004.

Gihukman kagahapon ni RTC judge Gabriel Ingles nga sad-an sila si Joel Cabonelas, Romeo Valleser, Joram Yong ug Hienjie Gonzalez. Miadto sila sa korte aron pagpaminaw sa desisyon, kay pyansado man sila.

Apan dihang nabasahan na sila sa hukom, diha-diha sila nga giposasan sa mga polis ug gidala ngadto sa Cebu City jail sa barangay Kalunasan. Tag 15 ka tuig ang ila nga silot nga pagkapriso. Usab pa mo?

Kamo diha, sayod ko nga daghan pang mga kawani sa City Hall nga tiggamitan og illegal nga drugas, gusto mo nga mosunod sa upat?

* * *

Atul sa Sinulog mardigras kaniadtong Enero, nasaksihan sa bagang duot sa katawhan ang paglamanohay ug pagtinagdanay nila ni Mayor Tomas Osmeña ug Gobernador Gwen Garcia.

Wala g’yod ko masayop nga kadtong tanan usa lang ka dakung lingla, apan luyo sa ila nga mga pahiyom niadtong higayona, may nagpahipi nga kayugot sa usag-usa nila ka galamhan.

Mao nga karon, nagbaharay na usab. Ang mga sakop sa gobernador miingon nga mokiha sa mayor kay mitudlo kini og direktor sa Metro Cebu Water District nga iya man unta kining katungod sa gobernador.

Mokiha usab kuno ang Kapitolyo sa dakbayan kun hinayonon ang plano nga pagkuha og pribadong individual aron palamboon ang Cebu City zoo diha sa Capitol Hills.

Si Tommy usab miingon nga wala siya mahadlok kun mokiha ang Kapitolyo kay andam usab niyang tubagon unya sa hukmanan. Kining tanan mahimo man unta nga masulbad kun manglingkod sila og husayon nga malinawon ang ila nga panagsungi.

Ayaw na mo’g away uy, Mayor Tom ug Gov. Gwen alang sa kalamboan sa gidumala ninyo nga local government unit. Mas maayo nga magtinabangay mo.