Ayoha g'yod pag-prosecute

Ang pagka dismiss sa kaso nga gipasaka batok ni kanhi gobernador John-john Osmeña wala gihapon makawagtang sa katahap sa uban nga siya miproteher g’yod sa illegal drug smuggler.

Bisan gani si Mayor Tomas Osmeña nga tua karon sa gawas sa nasud namahayag nga lisud mawagtang sa kaisipan sa katawhan nga si John-john nagproteher g’yod sa mga drug smugglers.

Matud pang Mayor Osmeña “Who cares what I believe. Lack of evidence does not eliminate suspicion.”

Pero bisan og si John-john tua sa laing nasud, matud sa mayor nga padayon sila nga maniid sa iyang kalihukan.

“We will monitor his activities in Cebu to be sure. This is a clear warning to John-john.”

Husto ang lakang ni Dangerous Drugs Board (DDB) Undersecretary Paul Clarence Oaminal nga awhagon g’yod ang Department of Justice nga mohimo sila og motion for reconsideration.

Kadtong mga langyaw nga gikahimamat ni John-john sa usa ka hotel sa Guadalupe sa wala pa ideliver ang mga pseudo-ephedrine dinhi sa Sugbo, kinahanglang ilang pamatud-an nga sakop kini sa drug syndicate.

Nabasa man g’yod nako ang mga dukomento sa PDEA, kadto ra g’yod tingali ang wala mahatagi og gibug-aton sa pagpresentar sa hukmanan.

Hala, fight Atty. Oaminal.

* * *

Binata na kaayo ang gihimo ni Gobernador Gwen Garcia nga pagsul-ob og sapot nga mora’g Zorra dihang giinterview siya sa media.

Kinsa kaha’y adviser ato? Isip opisyal sa probinsya, angay unta nga batonan ni Gobernador Garcia ang kalma nga batasan. Kun motubag siya sa mga isyu, walay problema.

Apan ang pagsul-ob og sama kuno sa “Tandang Sora” mora’g lahap na usab kaayo. Binata na kaayo ang iyang gihimo. Mora na hinuon siya og dili opisyal nga maoy gobernador sa Sugbo.

Tinuod, si Osmeña kanunay g’yod nga mohingan niya og “Zorra” kay diha man goy higayon nga may kalihukan sa Kapitolyo ug ang mi-escort sa gobernador paingon sa stage nagsul-ob og costume nga mora’g Zorro.

Ayaw na tawon to’g usba governor uy.

* * *

Belated birthday greetings diay ni Gina Jagmoc kaniadtong Huwebes. Asawa si Gina sa akong amigo nga si Konsehal Edwin Jagmoc.

Ang mga higala nako sa City Traffic Operations Management, ilabi na si traffic enforcer Wendel Minoza, nag-ampo g’yod og daghan pang katuigan alang ni Gina.

* * *

Alang ni konsehal Gerardo Carillo, hain may maayo og ang mga nasunogan nga pamilya sa Basak-San Nicolas inyong papuy-on sa yuta sa dakbayan nga napalit apan wala g’yoy namuyo.

Usik man god kaayo ang kwarta nga gastohon na usab sa dakbayan aron pagpalit og yuta nga papuy-an kanila nga unta daghan pa man og yuta ang dakbayan nga wala magamit.

Basaha ra god ninyo ang comment sa Commission on Audit mga upat ka tuig na ang nakalabay. Mitambag ang COA nga maghinay-hinay na ang dakbayan pagpamalit og yuta kay daghan pa kaayo kini og napalit nga wala g’yod magamit.

Ang uban god moingon man nga bati puy-an ang maong mga luna kay bakilid. Ang akong gipuy-an karon bakilid, apan dili nako ikatandi sa dihang nagpuyo pa ko sa barangay Lorega-San Miguel.

Diri sa kabukiran, mahanggap nimo ang hangin nga presko, bugnaw, green ang imong panan-aw, ug madungog nimo ang mga huni sa kalanggaman.

Ingon usab niini ang sitwasyon sa gipuy-an ni Konsehal Gerry. Dili na maayo nga mamalit pa kita’g yuta para sa nasunogan Sir Gerry kay lain na usab kini nga gasto. Tinuod bayran, apan kanus-a pa?