Banat ( Leaderboard Top ), pagematch: 1, sectionmatch: 1

Ang pagbakwi sa gobernador nga magsenador sa nasud

Nagkadaiya ang mitumaw nga pagtuo sa pagbakwi sa tinguha ni Gobernador Gwendolyn Garcia nga magsenador sa 2013 lokal election nga mao karon ang gihimong sumsoman sa mga Sugboanon.

Ang pipila nagtuo nga ang kontrobersiya sa Balili property ug ang mga gialigar nga nahimong kasaypanan nga makahatag og dakong epekto sa tinguha nga mahimong senador sa nasud.

Adunay nag-ingon nga ang labing ulahing resulta sa Pulse Asia nga nagbutang kang Gobernador Garcia sa ika-25 nga puwesto sa tanan nga pilionon nga mga senador sa 2013 lokal election maoy usa sa mga hinungdan sa kausaban sa hukom.

Nunot sa maong kausaban sa hukom sa gobernador maoy iyang gipahibalo nga mokandidato na lamang kini nga kongresista sa 3rd District sa Sugbo sa pagpuli sa iyang igsoon nga si Pablo John Garcia nga mao usab ang mohulip kaniya nga gobernador sa lalawigan sa pagtapos usab sa iyang ikatulong termino sa sunod tuig.

Hinuon taliwala sa maong pagtuo sa kausaban sa gobernador sa Sugbo sa iyang tinguha daghan usab ang mipadayag og kahinangop uban sa ilang gipatugbaw sa katarungan kun nganong ilang gipaluyohan ang pagbakwi sa gobernador sa iyang tinguha sa pagpalapad sa iyang serbisyo sa tibuok nasud.

Gipasabot nila nga mahimong kabahin ang labing ulahing survey sa Pulse Asia ug ang hangyo sa mga mayor apan ang labing bug-at mao nga iyang mabiyaan ang mahinungdanong gimbuhaton sa iyang buhatan ug ang mga kahasol sa iyang kahimtang.

Kun iyang ipadayon ang tinguha nga mokandidato sa pagka senador iyang gibutang sa kakuyaw iyang kaugalingon sanglit risgo man kaayo ang pagpunay og bahasbahas sa kahanginan sa pag-adto sa mga dapit sa Luzon, Visayas ug Mindanao sa pagpangampanya sa iyang kandidatura ug sa samang higayon gikinahanglan usab siya dinhi sa Sugbo sa pagkampanya sa mga kandidato sa One Cebu Party.

Gawas pa niana daghan pa ang mga gimbuhaton sa iyang buhatan niining naghinapos nga mga adlaw sa iyang pagpangatungdanan sa lalawigan nga kun iyang mataligam-an sa pag-atiman mao na unya hinuon ang makaingon nga masugamak kini sa mga pagsaway sa ilang mga kaatbang. (Romeo T. Limpangog)

  • Follow Us: