Philippines Team para sa AWCC ipinakilala sa media

MANILA, Philippines - Pormal na inanunsyo ng Philippine Superliga (PSL) ang binuong koponan na lalahok sa 2017 Asian Women’s Club Championships (AWCC) sa Kamenogorsk, Kazakhstan na mag-uumpisa sa Mayo 23-31.

Sa pangunguna ni PSL president Ramon ‘Tats’ Suzara, ipinakilala sa media ang 14 na manlalaro na magiging miyembro ng Rebisco-PSL Manila All Stars na hahalili sa Foton na siyang dapat magiging kinatawan ng bansa sa AWCC na nagpasyang hindi na lumahok sa torneo dahilan sa kakulangan ng manlalaro.

Naatasan na maging head coach ng koponan si women’s national team at UE Lady Warriors mentor Francis Vicente at team captain naman ang beteranang si Rachel Anne Daquis.

Ito ang unang pagkakataon na magpapadala ng ‘all-Filipino’ line-up ang ating bansa para sa isang overseas tournament, su-balit kumpiyansa pa rin si Suzara at Vicente sa ipapakitang laro ng koponan.

“These players already have the experience. They know how to compete in the international stage,” ayon kay Vicente.

Kabilang ang koponan sa Group B kung saan una nilang makakaharap ang Hisamitsu Springs na siyang kakatawan sa defending champions na Japan, Tianjin Bohai Bank ng China at Vietinbank.

Bago lumipad patu-ngong Kazahkstan, masasaksihan ang kakayahan ng mga All-Stars sa gaganaping “Clash of Heroes” event sa Mayo 15. FML