Na-sweep din ng Warriors

SALT LAKE CITY - Kagaya ng Cleveland Cavaliers, winalis din ng Golden State Warriors ang semifinal round nila ng Utah Jazz.

Nagpasabog si Stephen Curry ng 30 points para pangunahan ang Warriors sa 121-95 pagdurog sa Jazz sa Game Four para kumpletuhin ang four-game sweep sa kanilang Western Conference semifinals series.

Ito ang ikalawang sunod na pagwalis ng Golden State sa playoffs makaraang blangkuhin ang Portland Trail Bla-zers sa first round.

Lalabanan ng Warriors sa Western Conference Finals ang mananaig sa semifinals showdown ng Houston Rockets at San Antonio Spurs.

“We gotta good thing going, we’re playing well,” wika ni Curry. “Tonight we had an opportunity to seal the deal and thankfully we came out on top.”

Kaagad kumamada ang Golden State ng 39 points sa first quarter para itayo ang double-digit lead kontra sa Utah.

Ngunit hindi sumuko ang Jazz at nakalapit sa 52-60 sa halftime.

Nagawang makadikit ng Utah hanggang sa third period bago nagtuwang sina Curry at Andre Iguodala para sa kanilang mga three-pointers upang ilayong muli ang 2015 NBA champions sa 93-79 papasok sa fourth quarter.

Isa si Curry sa lima pang Warriors players na nagtala ng double figures.

Nagdagdag si Klay Thompson ng 21 points kasunod ang 18 markers ni Kevin Durant, samantalang tumapos si Draymond Green na may triple-double sa kanyang 17 points, 10 rebounds at 11 assists.

Pinangunahan naman ni Gordon Hayward ang Jazz mula sa kanyang 25 points kasunod ang 18 at 15 markers nina Shelvin Mack at Dante Exum, ayon sa pagkakasunod.

“Every team that we’ve played had a lot of pride,” wika ni Curry. “We haven’t lost but within these games we’ve really had to check ourselves. You can learn lessons through winning and that’s what we’ve done.”

Inilaro naman ni Hayward ang kanyang kahuli-hulihang game para sa Utah sa paghahanda niya sa free agency market.

“They make you pay for your mistakes,” ani Hayward. “You have to be almost perfect every possession, or else they turn it into a 9-0 run or 10-0 run.

“You can’t have one mental lapse against them. This was a great learning experience for us. They showed why they are who they are, and we’re not quite there yet. But you have to take positives from it,” dagdag pa nito.