Clash of Heroes iniurong sa Mayo 15

MANILA, Philippines -  Ipinagpaliban ng organizing PSC-POC Media Group at Larong Volleyball sa Pilipinas, Inc. ang nakatakdang “Clash of Heroes” sa Mayo 15 sa FilOil Flying V Arena sa San Juan City para pagtuunan ng mga manlalaro ng Ateneo at La Salle ang kanilang best-of-three Finals sa 79th University Athletic Association of the Philippines.

Maghaharap ang Lady Archers at Lady Eagles sa Game One ng UAAP Finals sa Mayo 2 at ang Game 2 ay sa Mayo 6, kaya napag-isipan ni LVPI  acting president Peter Cayco na ipagpaliban ang “Clash of Heroes” na orihinal nakatakda sa Abril 28.

Ikinasa ang nasabing fund-rasing project para makalikom ng pondo para sa foreign training at exposures ng national women’s at national men’s team na sasabak sa 29th Southeast Asian Games ngayong Agosto 19 hanggang 31 sa Kuala Lumpur, Malaysia.                 

 “Holding the event to a later date is very sound and logical,” sabi ni Cayco, na siyang binigyan ng katungkulan ni LVPI president Joey Romasanta para pangunahan ang naturang proyekto.

“Aside from giving Ateneo and La Salle players the chance to set their attention on winning the title, this will also allow fans to enjoy the UAAP finals and cheer for the national team. This move is a win-win solution for all of us,” dagdag ni Cayco.

Ilan sa mga manlalaro ng La Salle kagaya ni Kim Fajardo at Dawn Macandili ng La Salle at Kat Tolentino at Maddie Madayag ng Ateneo ay kasama ring umaasa na mapasama sa national team.

Ang tickets ay ibinibenta sa halagang P200 (lower box) at  P100 (upper box) sa PSC-POC media center sa loob ng Rizal Memorial Sports Complex.