Makalibog ug makapabalaka

Labing unang opisyal nga pamahayag sa gobiyerno sa duguong engkuwentro sa Inabanga, Bohol, nga giluwatan pila ka oras human sa pag-ulbo sa panagsangka niadtong Martes Santo, Abril 11, pinirmahan nila ni PRO-7 Chief Noli Taliño ug CentCom Chief Oscar Lactao.

Nideklarar og kadaogan batok sa Abu Sayyaf Group pinaagi sa pagpahibawo nga unom ang napatay sa mga bandido, pagpasidungog sa kamabayanihon sa tulo ka sundawo ug usa ka polis nga nakalas, ug pagpasalamat sa hingpit nga tabang sa mga molupyo ug lokal nga mga opisyal sa Inabanga, Bohol.

* * *

Wa’y nakaako pagsupak sa pangangkon og kadaogan kay nahuwasan ang tanang hingtungdan sa pagkabaraw sa labing seryusong hulga batok sa seguridad sa Bohol, Sugbo ug Central Visayas. Gawas nga makiangayon lang nga nagbangotan ang katawhan alang sa mga tagtungod sa bayaning polis ug mga sundawo.

Apan ang pagkabisto nga walo ka bandido ang nakaikyas ug nga magtiayong sibilyan diay ang duha sa nangamatay sa engkuwentro, nakapatumaw sa pagduda nga mahimong dili hingpit nga kontrolado sa militar ug kapolisan ang kahimtang sa kahusay ug kalinaw dinhi sa atong kaugalingong nataran.

* * *

Ang pagtino sa militar ug kapolisan sa presensiya sa armadong mga tawo sa Olango Island, pila ka gutlo ra ang gilay-on gikan sa Dakbayan sa Lapu-Lapu, kun biyaheon, nakapatumaw sab sa pagduda sa pangangkon sa gobiyerno nga natanggong ug dili na makagawas sa kalasangan sa Inabanga ang samaran ug gipanggutom na nga mga bandido.

Ang kapakyas sa hinugpong nga puwersa sa Philippine National Police, Philippine Army ug Philippine Navy pagtultol ug pagdakop sa armadong mga tawo human sa tibuok gabii ug tibuok adlaw nga pagsudlay, dili makatabang pagpakalma sa kabalaka sa mga Sugbuanon.

* * *

Laing makapahasol nga kasayuran ang gibutyag ni Barangay Kapitan Cyrus Eyas sa San Vicente, Olango sa DYAB Radyo Patrol: Una, Huwebes Santo pa nga nakit-an ang armadong mga tawo sa San Vicente apan wa tagda sa mga molupyo hangtod nga may babayeng nidangop sa kapolisan human gipangayoan og pagkaon; ug

Ikaduha, mahimong mas daghan, kay sa duha, ang armadong mga tawo nga anaa ron sa Olango kay nakakita sab og mga armado ang mga molupyo sa Tuburan ug Asinan sa silingang Barangay sa Sabang. ([email protected])