Sir Litz basketball camp nagsugod na, modawat pag mga partisipante

CEBU, Philippines - Misikad na ang karong tuig nga edisyon sa Sir Litz One on One Basketball Training Camp kagahapong adlawa didto sa covered court sa Yati Elementary School sa Liloan diin kini gidugokan sa kapin sa usa ka gatos ka mga batan-ong basketbolista.

Apan bisan pa man sa maong gidaghanon sa mga misalmot nga wala niya damha, si camp director Edcel Vallena nagkanayon nga modawat gihapon sila og mga partisipante sa usa ka bulan nilang clinic hangtud karong semanaha.

"Kining among camp abli ngadto sa bisan nag-edad na og 20 anyos. Para nako, dili mo-matter ang edad ilabi na niadtong gusto makat-on ug mahashas pa og maayo ang ilang abilidad sa basketbol," matud pa ni Vallena, kanhi collegiate standout ug beteranong coach.

Kadtong magparehistro makadawat og reversible jersey. Alang sa dugang impormasyon, kadtong mga interesado mahimong motawag sa 0906-4683775 o 0943-6068834.

Kay nagpadayon pa man ang klase sa Yati ES, si Vallena mipahibawo nga ang ilang training session, nga gikatakda gikan sa alas-8 sa buntag hangtud sa alas-12 sa udto adlaw'ng Lunes ngadto sa Biyernes, adto una ipahigayon sa San Vicente gym hangtud sa Abril 7. Mobalik kini sa Yati unya sa Abril 10.

Anaa karon sa ika-17 niining tuig, ang Sir Litz mapasigarbohon isip usa sa labing dugay nga basketball training camps dinhi sa Sugbo. Usa sa labing maayo niining produkto mao si John Paul Desiderio nga usa ka Liloanon.

Si Desiderio maoy star guard sa University of the Philippines Maroons sa UAAP nga nagduwa sab uban sa Cafe France sa PBA D-League. Una siyang mihimo og pangan isip sakop sa University of the Visayas Baby Lancers. (BANAT NEWS)