Gesta gisugat og daog sa pagbalik niya'g away

CEBU, Philippines - Human wala makaaway sa miaging tuig gumikan sa angol sa iyang abaga, si Mercito 'No Fear' Gesta mibalik og saka sa ring nga madaugon human mipatigbabaw batok sa Mehikanong si Gilberto "El Flaco" Gonzalez pinaagi sa unanimous decision kagahapong adlawa didto sa The Cosmopolitan Resort and Casino sa Las Vegas, Nevada.

Ang garbo sa dakbayan sa Mandaue nga toa na karon nagbase sa San Diego, California madasigon nga mibangon human matumba sa ikatulong hugna dayon na ngadto sa pagposte og mahinungdanong daog nga seguradong makapainit og balik sa nabugnaw niyang karera.

Ang tulo ka judges miiskor og 99-91, 98-92 ug 96-93 alang ni Gesta, nga nagbitbit na karon og 30-1-2 record uban ang 16KOs.

Human masukarap sa ikatulong hugna, si Gesta dali nga nakabawi og hapit niini palukapaha si Gonzalez sa ikaupat nga hugna. Gidominar niya ang nahibiling bahin sa away aron pagtunol ni Gonzalez sa ikaupat niining pilde sa 31 ka away. (BANAT NEWS)