Nietes doble kayud sa preparasyon
CEBU, Philippines - Si Donnie 'Ahas' Nietes uban ang lain pang duha ka mga bitoon sa ALA Boxing Gym nga sila si Mark 'Magnifico' Magsayo ug Jeo 'Santino' Santisima mipahigayon sa katapusan nilang public workout niadtong Sabado sa hapon didto sa Robinsons Galleria Cebu isip kabahin sa ilang preparasyon sa tagsa-tagsa nila ka mga away sa 'Pinoy Pride 40–Domination' karong Abril 29 diha sa Waterfront Cebu City Hotel & Casino.
Mosuway si Nietes og sakmit sa IBF flyweight title sa iyang pakigsangka ni Komgrich Nantapech sa Thailand, si Magsayo makigharong ni Issa 'Peche Boy' Nampepeche sa Tanzania, samtang si Jeo 'Santino' Santisima makigbinukbukay ni Master Suro sa Indonesia.
Sud sa 45 minutos, ang tulo miwadwad sa ilang abilidad atubangan sa bagang panon sa mga tawo.
“This is our last public workout because in the next two weeks we can no longer disturb them,” matud pa ni ALA Promotions PR manager Chelna Locaylocay sigun sa taho ni Dong Secuya sa Philboxing.
Ang mosunod nga duha ka semana maoy krusyal nga bahin sa pagpangandam ni Nietes diin siya mopahigayon na og 12 ka hugna nga sparring sessions.
“Right now Donnie is already doing 10 rounds sparring. Next week he will do 12-rounds then we will taper off in the final two weeks,” dason pa ni ALA Promotions chief trainer ug matchmaker Edito Villamor sa susamang taho ni Secuya.
Mismo si Nietes ang mipadayag nga doble ang gibubo niyang enerhiya matag training kay sayud siya nga dili sayon nga away ang iyang atubangon sa unahan.
“We're working very hard. It's not easy because I'm not taking this fight easy,” batbat pa ni Nietes, nga nagtinguha nga mamahimo nga ikatulo lamang nga Pinoy'ng boksidor nga nakadaog og tulo ka world titles o sobra pa sa managlahing weight divisions sunod nilang Manny Pacquiao ug Nonito Donaire Jr. (BANAT NEWS)
- Latest
