Pagtudlo sa opisyal sa barangay kuti ­– Davide

CEBU, Philippines - Gihulagway ni Gobernador Hilario Davide III nga kuti ang paagi kung si Presidente Rodrigo Duterte ang motudlo sa mga opisyal sa barangay nunot sa plano nga walay eleksiyon karong Oktubre.

“Pila gud ka barangay all over the country, that’s very tedious for the President, ang katong i-screen ana nila ang itudlo nga barangay captain para nako madugay gyud na, if they can do it now or kung kanus-a na ma-appoint,” matud ni Davide. Ang gobernador una na nga niingon nga supak siya nga itudlo ang lider sa barangay tungod kay angay nga ang katawhan hatagan og kahigayunan nga mopili sa ilang gusto nga lider.

“If  ang appre-hension sa Presidente naa gihapon narco-politics ang mga tawo mismo makahibalo kinsa na ang mga kandidato na involve sa drugs so ila nang likayan, they will not vote for them, kung gamiton ang kwarta i-bribe sila to vote dapat ang mga tawo sensible for that,” matud ni Davide.

Ang baruganan ni Davide suportado ni Bise Gob. Agnes Magpale.

Apan ang bise gobernador nagkanayon nga mas maayo nga dili lang ang Department of Interior and local Government (DILG) ang angay nga motabang sa Presidente sa pagpili sa lider sa barangay.

Nabalaka si Magpale sa pamahayag sa Presidente nga 40 porsiyento sa mga kapitan sa nasud ang nalambigit sa ilegal nga drugas hinungdan nga pabor siya sa lakang ni Duterte.

Apan matud ni Magpale nga angay sab nga adunay konsultasyon sa people’s organizations ug non-government organizations sanglit ang maong grupo maoy suhito sa mga tawo ug maoy nagsilbing tingug sa katawhan.

Ang kapitan sa Barangay Ezperanza, Poro, Isla sa Camotes, nga si Dina Rama kinsa maoy pangulo sa Association of Barangay Councils sa lungsod, nagkanayon nga suportado niya ang plano ni Duterte.

Apan kung siya ang pabut-on mas maayo gihapon nga adunay eleksyon.

Si DILG Secretary Mike Sueno nipasabot nga ang pagpili sa mga lider sa barangay sa Presidente adunay koordinasyon sa mga lokal nga opisyal, DILG ug NGOs. (BANAT NEWS)