EDITORYAL - Depensa ni Duterte kang Robredo

Karon daw sa gibuboan og bugnaw’ng tubig ni Presidente Duterte ang plano sa iyang mga kaalyado diha sa Ubos Balay-Balauranan nga ipa-impeach si Bise Presidente Leni Robredo. Kun tinuod kini sa kasing-kasing ni Duterte, modaghan ang mosalig kaniya isip lider sa nasud tungod kay naghunahuna siya, dili lang sa interes o kaayohan sa iyang mga supporters o mga kaalyado, kun dili, sa tibuok katawhang Pilipino.

Husto si Duterte nga dili makaayo sa nasud kining maong lakang kay makamugna kini og kagubot, ug ang mag-antos gyud mao ang yanong mga tawo. Ang presidente mismo ang miingon nga wala siya makakita og “overt act” o kanang pisikal nga gibuhat ni Robredo nga ang tumong mao ang pagpalagpot kaniya.

Maayo unta og makasabot ang mga kaalyado ni Duterte sa buot niyang ipasabot, nga kining iyang pamunoan dili para lang kanila, kun dili, para sa tanan. Lahi ra baya gyud ang kritisismo nga mao karo’y gibuhat ni Robredo kun ikomparar sa gitawag og destabilisasyon. Dili supak sa balaod ang pagpadayag, butang nga nakalimtan sa mga kaalyado ni Duterte diha sa Ubos Balay-Balauranan.

Peligro kini tungod kun ang katawhang tigpaluyo ni Duterte motuo kanila ug moapil pagsugnod sa isyu nga maoy makaingon sa dakong kagubot ug makapilde kanatong tanan. Naghinobra ra kaayo ang kakulba sa mga kaalyado ni Duterte mao nga bisan og katungod sa mga Pilipino ang pagpadayag, apan basta batok gani sa presidente, ila na nga isipon dayon nga destabilisasyon.

Ang Department of National Defense ug ang militar mipasalig nga ilang batokan ang bisan unsang lakang sa destabilisasyon, apan si Duterte mismo miingon nga dili ganahan ang militar ug kapolisan sa mga planong impeachment kay magkagubot lang ang nasud.

Mas maayong paminawon ang presidente nungka nga magpadala lang sa emosyon nga wa’y basehanan kay ang mga Pilipino ra gihapon maoy mag-antos sa katapusan.