Kabilin ni Onyot
Gikataw-an lang niya ang pasidaan sa iyang apohan sa dili pag-usik og tu’ sa ilang gripo. Gamay pa siya dihang gitugyanan sa pag-atiman sa iyang mga apohan sa Sepulveda sa Dakbayan sa Sugbo kay nanglangyaw sa Estados Unidos ang iyang mga ginikanan pagpatambal sa kanser sa tutonlan sa iyang inahan.
Gipasidan-an siya ni Canuto Oposa (iyang Papa Oto), lumad sa Bantayan, nga dili abunda ang tubig, nga kun dili magdaginot moabot ang panahon nga mamalit na sila og tubig. Human sa lima ka dekada, natinuod ang pasidaan. Gikuyawan siya nga maabtan sa iyang mga anak ang panahon nga kinahanglang mamalit na og hangin.
* * *
Dahunog nga bahakhak ra’y itubag ni Atty. Antonio “Onyot” Oposa kun pangutan-on sa iyang edad. Apan segun sa Google, 63-anyos na siya. Gipasidungog niya ni Papa Oto ang iyang gugma sa dagat ug pagpakabana sa pagpanalipod sa kinaiyahan.
Mas mahinungdanon alang niya, labaw sa Ramon Magsaysay Award ug ubang kalibutanong pasidungog, ang pagsabot sa iyang asawang si Greely Remulla ug pagpakabana sa kinaiyahan sa ilang mga anak: Juan Antonio (abogado sa renewable energy), Anna (nagtukod sa SEA CAMP ug Save Philippine Seas), Uli (eksperto sa waste segregation) ug Kiano (nagpalambo og bird park).
* * *
Gilusad ni Oposa ang iyang libro nga “Shooting Stars and Dancing Fish” uban sa Sugbuanong kanhi Chief Justice Hilario Davide Jr. nga maoy niumol sa makasaysayanong doktrina sa intergenerational responsibility sa kinaiyahan pinasikad sa kasong Oposa vs. Factoran.
Nabalaka si Oposa nga ang mga pasidaan sa pagkagusbat sa kinaiyahan labihan kasihag nga kinahanglang ihulagway sa yano nga mga sugilanon sa iyang libro aron makaangkon og bayhon ug kahulogan labi na alang sa umaabot nga kaliwatan.
* * *
Usa sa unang nipalit sa libro mao ang iyang tinun-an sa abogasiya, si kanhi Cebu City Legal Officer Ralph Sevilla, kinsa nihinumdom nga giaporan silang Oposa ug giawhag nga tipigan ang sihag niyang calling card kay mao to ang kataposan niyang tuig pagpanglaban sa Sugbo.
Pagka sunod tuig ni-eskuyla siya sa Harvard ug nipaambit sa iyang kawsa sa tibuok kalibutan. Nibalik sa Sugbo paglusad sa iyang libro. Nangimbitar sab nga mangyaka sa baybayon sa Bantayan nga kabilin ni Papa Oto, manganta ug mamalak samtang magsud-ong sa mga isda ug bituon.
- Latest
