Brgy Lahug, Cebu City
“Butangan unta og suga ang karsada gikan sa Velez lot hangtod na sa View Hills, La Guerta kay ngitngit kaayo ug kuyaw sa mga estudyante nga moagi dihang dapita. Sigehan ra man mi’g saad sa mga opisyal namo sa barangay, wa’y gihimong aksyon.”
Brgy Poblacion, Boljoon, Cebu
“Rampant na man kaayo ang illegal gambling diri sa among lungsod, sama sa swertres ug hantak pero wala may aksyon nga gihimo ang mga polis diri. Naa diay kuno’y polis diri nga nagranggo og SPO2 nga protector sa ilegal nga sugal.
Brgy Basak, Cebu City
“Diri sa Cabreros kay guba na man gyud kaayo ang karsada, labi na ang gikan sa Alumnos padulong sa CYCO. Luoy kaayo ang mga pasahero sa jeep kay sige lang og kasukamod ug kapakong.
Brgy Ibo, Lapu-Lapu City
“Diri sa eskina Saac sa Sitio Paraiso naa may daghang namaligya’g shabu apan wala man gyud ni sila dakpa nga klaro man kaayo kun kinsa kining mga tawhana? Murag napasagdan na sa mga polis ang among lugar kay hasta hantak wala sab badlonga.”
Brgy Maribago, Lapu-Lapu City
“Namalik man sa ilang bisyo ang mga natukhang na diri sa Sitio Looc, daghan kaayo ni sila nga nanuyop na og balik. Unya ang uban maoy namaligya, labi na ang ig-agaw sa among kapitan.
Brgy Lahug, Cebu City
“Naa ko’y gipadangat nimo nga problema sa mga manuyopay diri sa Camagong pero wala man gyud tagda naa diay kay pinili sir? Manghinaot kami nga niining higayona maaksyonan na gyud kining among gipadangat nga reklamo.”
Brgy Mactan, Lapu-Lapu City
“Kining diri sa pantalan sa Angasil, paingon sa Olango Island kay daghan man kaayo ang mag-estambay nga mga batan-on, mura’g mga adik. Kuyawan mi nga mga pasahero nga mabiyaan sa last trip inig ka gabii kay basin unsay buhaton niining mga tawhana.”
Brgy Mojon, Talisay City
“Diri sa Sitio Bontores inig tungang gabii naa gyuy mga batan-on nga maglinabayay og bato ug botelya. Ang among gikuyawan kay maamong kaming mga nagpuyo diri, mireklamo nami sa barangay pero walay gihimo.”
Brgy Tinago, Cebu City
“Nagkagrabe na man hinuon ang pagpamaligya’g shabu diri sa Sitio Silangan, nidaghan na man hinuon imbes nga momenos, ang uban nga namaligya menor de edad pa. Wala man say nakabadlong nga mga opisyal sa barangay.
Brgy Calamba, Cebu City
“Naunsa na man kining among barangay nga imbes mawagtang ang shabu nagkadaghan na man hinuon ang nanggawas nga mga mamarokay, labi na diri dapit sa Quijano compound nga maoy pinaka-interior gyud nga lugar sa among barangay, naghitak gyud ni sila.”
Alang sa inyong mga reklamo text lang sa 09326425494
- Latest
