Huey-Mirnyi tandem runner-up sa Delray Beach Open netfest

MANILA, Philippines -  Nagkasya sa runner-up trophy sina Filipino-American Treat Huey at Belarusian Max Mirnyi sa prestihiyosong ATP World Tour Delray Beach Open na ginanap sa Delray Beach sa Amerika.

Umani ng dikit na 5-7, 5-7  kabiguan ang third-seeded na sina Huey at Mirnyi laban kina second seeds Raven Klaasen ng South Africa at Rajeen Ram ng Amerika sa championship round.

Naibulsa nina Klaasen at Ram ang $29,010 premyo habang nag-uwi rin sina Huey at Mirnyi ng $15,250 konsolasyon.

Maliban sa cash prize, umani rin ng 150 puntos sina Huey at Mirnyi para sa kanilang ATP world ranking.

Nakapasok sa finals sina Huey at Mirnyi matapos payukuin sina Robert Lindstedt ng Sweden at Michael venus ng New Zealand sa first round (7-5, 6-3), Tommy Haas ng Germany at Vasek Pospisil ng Canada sa quarterfinals (7-6 (5), 6-2) at sina Lu Yen-Hsun ng Chinese-Taipei at Leander Paes ng India sa semifinals (6-2, 6-1).

Sunod na aarangkada sina Huey at Mirnyi sa Abierto Mexicano Tecel na magsisimula ngayong araw sa Acapulco, Mexico kung saan ipagtatanggol ng dalawa ang kanilang titulo.

Sisimulan nina Huey at Mirnyi ang pagdepensa sa korona laban kina Oliver Marach ng Austria at Fabrice Martin ng France sa first round ng torneong may nakalaang tumataginting na $1,469,745 kabuuang premyo.

Nasungkit nina Huey at Mirnyi ang kampeonato noong nakaraang taon matapos igupo sina Alexander Peya ng Austria at Philipp Petzschner ng Germany sa championship round, 7-6 (5), 6-3.