‘Vulcan’ wala kabuto

GENERAL SANTOS CITY, Philippines – Ang ‘Vulcan’ sa ALA Gym nga si Raul Yu wala makabuto sa Gensan human siya gipilde ni Jade Bornea sa Sanman-Amoy Boxing Club sa duguon nilang 10 ka hugna nga binukbukay nga gikahimuot og maayo sa bagang duot sa fans nga misaksi sa “Laban Pinoy 3: Rise of Champions” niadtong Domingo sa gabii dinhi sa Lagao Gym.

Gawas nga miinat sa iyang rekord ngadto sa 7-0 uban ang 4KOs, gisakmit sab ni Bornea ang IBF super flyweight title nga seguradong makahatag kaniya og world rankings sa dili madugay.

Grabe nga klase sa pinaksitay ang gipakita sa duha ka boksingero, apan si Bornea maoy nakauna human siya mipauwan og suntok  nga nalandig sa ulo ni Vulcan sa ikaduha ug ikatulong hugna.

Apan si Yu nakabawos sa ikaupat nga hugna diin siya na sab ang mibatil sa iyang kontra og mahait nga mga kinumo ngadto sa ulo hinungdan nga si Bornea nakaangkon og gisi sa ibabaw nga bahin sa wala niyang mata ug paghubag sa nawong.

Human sa kalmado nga ikalimang hugna, si Bornea nanginit na sab sa ikaunom nga hugna diin girapido na sab niya og kombinasyon si Yu. Hinuon, ang boksidor sa ALA mipakita og igong kalig-on hinungdan nga nakalingkawas kini sa peligrosong kahimtang.

Daw sa nahutdan og lana si Bornea sa ikapito nga hugna hinungdan nga gipahimuslan kini ni Yu paglusad og laing ataki.

Pipila ka gutlo human giwarningan si Yu gumikan sa ‘low-blow’ sa sayong bahin sa 8th round, si Yu nakaangkon og dakung gisi sa tuo niyang kilay gumikan sa headbutt. Daw sa nahimo kini niyang patyanan kay mao na man kini ang gihimo nga target ni Bornea nga nagpunay og birada sa nagkadugo niyang nawong sa nahabiling bahin sa huego todo nilang kumbati.

Human sa eksplosibo nilang bugno, si Bornea maoy  mipatigbabaw sa scorecards sa mga judges. Ang duha ka hurado parehong mitali og 97-73, samtang ang laing usa mihatag og 98-92 pabor sa pambato sa Sanman. (BANAT NEWS)