Opisina ni Sitoy
Namiligro nga mabungkag ang opisina nga gi- huptan ni kanhi Cordova Mayor Adelino Sitoy sa Malacañang. Nakaplastar na unta si Sitoy didto. Apan samtang maayo ang iyang pagkahiluna sa sabakan sa Presidente, dakong unos ang mitay-og sa iyang lingkoranan didto sa Palasyo.
Takulahaw lamang nga misulod sa eksena si House Speaker Pantaleon Alvarez. Sa iyang sulat ngadto kang Presidente Rodrigo Duterte, gisugyot ni Alvarez ang pagbungkag sa Presidential Legislative Liaison Office (PLLO) nga gihuptan karon ni Sitoy.
Kontensiyon ni Alvarez mao nga usik lamang sa salapi sa lungsod ang pagpadagan pa sa maong opisina. Kini tungod lagi kay dali lamang nga makontak ang buhatan sa Presidente sa mga kadagkoan sa Kongreso bisan pa man kun wala ang PLLO.
Ang PLLO gitukod kaniadtong 1987 sa adminis- trasyon ni kanhi Presidente Corazon Aquino. Tungod kay ilalum kini sa executive department, lakip sa operasyon niini mao ang pagpakigtambayayong uban sa legislative nga sanga sa kagamhanan, ilabina mahitungod sa balaudnong inisyatiba sa ehekutibo.
Tungod lagi kay natukod ang maong buhatan 30 ka tuig na ang nakalabay, haum pa ba ang operasyon sa PLLO niining modernong panahon? Sa tan-aw ni Alvarez ug sa uban pang mga magbabalaud dili na siguro uso. Kini gumikan kay dali na lamang silang makakonek ngadto sa Presidente.
Hinuon, sa laing bahin, insakto usab kini si Alvarez. Dili ikalimod nga grabe ka suod ang House Speaker ug ang Senate president ni Duterte. Ug kun komunikasyon lamang ang hisgotan, tulin pa siguro sa alas kwatro ang ilang pagbinayloay og mga mensahe.
Peligro nga mabungkag ang opisina si Sitoy niining lakang karon ni Alvarez. Nagpasabot ba kini nga mawad-an og trabaho ang garbo sa Cordova. Sayang kay mi-resign gayud si Sitoy pagka-bise mayor sa maong lungsod aron lamang pagkubit sa maong posisyon.
Karon, anaa na sa mga kamot sa Presidente ang sitwasyon ni Sitoy. Kun mosanong gayud si Duterte sa rekomendasyon ni Alvarez, nagpasabot ba nga magsugod na usab og ihap si Sitoy sa iyang mga adlaw sa Palasyo? Ato lamang panid-an.
- Latest
