Yap hari sa 'Kita Ang Katag' chessfest

CEBU, Philippines - Si International Master Kim Steven Yap mipahimus sa kahigayonan nga nahatagan og wildcard entry dayon na ngadto sa pagdominar sa “Kita Ang Katag” Open Chess Tournament 2017 nga natapos niadtong Miyerkules sa gabii didto sa Knight Attack Chess Cafe sa Robinsons Galleria, Cebu.

Sila si Yap ug FIDE Master Anthony Makinano nangatagak na gyud unta kay mitapos lamang sa ika-15 ug ika-16 nga puwesto human sa unang hugna sa eliminasyon, apan nasalbar pa sila ug miabante sa final 16 knockout stage human gihatagan og wildcard entries ni US-based Cebuano chess patron Dr. Darcy Tabo-Tabo, ang nagpasiugda sa torneyo nga midalit og dul-an sa P30,000 nga ganting salapi ngadto sa mga mananaog.

Gumikan niini, sila si Yap ug Makinano nakigduyog nilang Rommel Ganzon, Edsel Montoya, Richard Natividad, IM Rico Mascariñas, Bonn Rainauld Tibod, NM Arnolito Cadiz, Linky Yap, NM Merben Roque, Rodrigo Alejandre, Ronald Ganzon, Michael Joseph Pagaran, Yves Christian Fiel ug Carlos Moreno III sa stage 2 diin sila gibahin ngadto sa upat ka grupo.

Gipahimuslan ni Yap ang laing kinabuhi nga iyang naangkon aron pagdaog sa iyang bracket uban nilang National Master Merben Roque, Carlos Moreno III ug Ronald Ganzon.   Garantisado na og P2,500 matag usa, milahos silang upat sa kampiyonato diin sila mibanat og laing hugna sa rapid simultaneous games.

Human sa mainitong aksiyon, sila si Yap ug Ganzon parehong mitali og 2.5 puntos hinungdan sa armageddon tie-breaker kon sudden-death play sa duwang chess. Sa kinauwahian, si Yap maoy mipatigbabaw aron pagbulsa sa P10,000 nga ganti. (BANAT NEWS)