Gisungag sa Bulls
CEBU, Philippines - Si Jimmy Butler mipasud og 10 ka sagunson nga puntos sa krusyal nga bahin sa katapusang kuwarter ug nahimo kining taytayan sa Chicago Bulls ngadto sa ilang 106-94 nga kadaugan batok sa defending champion Cleveland Cavaliers sa NBA kagahapon didto sa Quicken Loans Arena sa Cleveland, Ohio.
Daw sa gisungog gyud sa panahon ang Cavs kay gawas nga wala ang duha ka bitoon nilang si Kyrie Irving ug Kevin Love, miduwa sab nga dili 100 porsiyento ang alas nilang si LeBron James tungod sa trangkaso. Si Irving dunay armstrong injury, samtang si Love nakasinati gihapon sa dili maayong epekto sa pagkahilo og pagkaon.
Taliwala niining tanan nga kakulian sa Cleveland, si Butler misiaw sa kampo sa Bulls diin siya mipabuhagay og 14 sa iyang 20 puntos sa katapusang kuwarter nga maoy nakapahagba sa nagkagidlay nga Cavaliers.
Miabag ni Butler si Doug McDermott nga dunay 17 puntos sa Bulls, nga milansang og season-high 13 ka tres.
Bisan pa man og dili maayo ang paminaw, si James mitapos gihapon og 31 puntos uban ang walo ka rebounds ug pito ka assists.
Didto sa Oakland, California, si Stephen Curry miratsada og 35 puntos ug si Kevin Durant mibadlis og 30 sa dihang gipakaging sa Golden State Warriors ang Portland TrailBlazers, 125-117 alang sa ikasiyam nilang sunod-sunod nga daog didto sa ilang balwarte.
Si Curry nga milangkat sab og pito ka rebounds ug mipasa og lima ka assists, mipasud og 12 sa 25 niya ka itsa nga igo kaayong nagtapak sa kabugnaw sa iyang Splash Brother nga si Klay Thompson nga usa lamang sa pito ka tirada ang naigo aron paghipos lamang og 14 puntos.
Sa laing mga aksiyon, ang Milwaukee Bucks nakaeskapo batok sa New York Knicks, 105-104, ang LA Clippers mipakgang sa Memphis Grizzlies, 115-106, ang Charlotte Hornets mipukan sa Oklahoma City Thunder, 123-112, samtang ang Atlanta Hawks midagit sa Orlando Magic sa iskor nga 111-92. (BANAT NEWS)
- Latest
