Pagdeklarar og drug free kinahanglan dokumentado — Chiong

CEBU, Philippines - Gipahibawo ni City of Naga Mayor Kristine Vannessa Chiong nga dili na kinahanglan nga modeklarar pa nga drug free ang usa ka lugar kun siya pabut-on.

Matud ni Mayor Chiong nga iya nana sa katawhan nga moila sa lugar nga wala nay drugas kay sila man ang anaa sa lugar. Samtang ang kapolisan ug lokal nga kagamhanan ang mohimo ug magpadayon sa ilang trabaho aron malikay ang katawhan sa ginadiling drugas.

Si PSupt. Gregorio Galsim, hepe sa kapolisan sa maong dakbayan nibutyag nga duha ngadto sa tulo ka barangay ang ilang gitutukan aron ilang ideklarar nga drug free.

Si Chiong nipahimangno sa kapolisan nga magmatngon sa ilang pagdeklarar og drug free kay alang niya, ang pagdeklarar aduna gyuy mga dokumento ug ebidensiya nga gi-validate sa insaktong ahensiya sa gobiyerno.

Asoy pa sa mayor nga kinahanglan nga magtakdo ang report sa kapolisan ug sa Barangay Anti-Drug Abuse Council (BADAC) ug sa siyudad una pa ideklarar ang usa ka lugar nga drug free.

Gipanglantawan ni Galsim nga mahimong drug free na unya ang Barangay Mayana ug Lanas, mga bukirang barangay sa Naga nga aduna lay pipila ka populasyon.

Gipasabot ni Galsim nga gibasehan sa PNP nga ideklarar nga drug free ang lugar kun wala nay drug dependents, drug pushers ug drug protectors.

Hinuon si Chiong niuyon sa duha ka barangay nga gihisgutan ni Galsim tungod sa paghingusog ug kaatikbo sa mga opisyales sa barangay sa nahisgutang lugar. Sa bahin sa mayor ilang gisiguro ang pag-edukar sa mga kabatan-onan nga malikay sa ginadiling drugas ingon man pag-atiman sa mga tawo nga nitahan aron moundang na sa bisyo.

Sa laing bahin naglaraw si Galsim nga padaghanon ang kapolisan nga makita sa kadalanan sa Naga human niya maobserbahi nga mas daghang panghitabo sa maong lugar ikumpara sa hilit o bukirang lugar sa Naga.

Matud niya nga kampanti ang katawhan nga makakita nga adunay mga tinugyanan sa balaud nga makita sa karsada diin mataha ang mga dautang elemento nga mohimo og dautang plano.

Gawas pa sa pagbantay sa krimen, dali sab unya nilang masita ang mga motorista nga badlungon. Ang Siyudad sa Naga aduna’y taas nga rating sa kaso sa disgrasya sa kadalanan, matud pa ni Galsim.

Dugang niya nga makatabang sab ang kapolisan sa pagmenus sa grabeng kahuot sa trapiko kay dali na silang makaresponde kun aduna man gani mga panghitabong disgrasya. -/DILT (BANAT NEWS)