Muslim Community ‘tabang og bantay sa Sinulog 2017

CEBU, Philippines - Seguridad sa kapistahan ni Sr. Santo Niño, gipangandaman na sa tanang ahensiya sa gobiyerno diin kapin sa 5 mil ka force multipliers uban ang kapolisan ug military ang mobantay niini.

Gipahibawo ni PRO-7 director PCSupt. Noli Taliño nga padayon ang ilang koordinasiyon sa tanang ahensiya sa gobiyerno ug sa mga nagkadaiyang hugpong alang sa kahapsay sa seguridad sa kapistahan sa Sugbo. Gani sugod Enero 5, ipakatap nila ang kapolisan uban ang Philippine Navy, Air Force, Regional Public Safety Batallion-7 ug force multipliers.

Gitahasan ni Taliño si PSupt. Joel Doria isip pangulo sa Task Group Commander of Cebu diin mopahigayon sila og dry run alang sa pagpahugot sa seguridad.

Gitug-an niini nga walay direkta ug specific nga bomb threat nga nadawat ang Sugbo apan hangyo niya sa publiko nga pabiling magmabinantayon ug motaho kun adunay kadudahan og lihok.

Si Fr. Aladin Luzon ang pangulo sa security preparations sa Basilica Minore del Sto. Niño nitug-an nga nakahan-ay na sab ang ilang hugot nga seguridad alang sa kapistahan diin dili mominos sa usa ka gatos ka security personnels ang ilang ipakatap sa sulod ug gawas sa simbahan. Gani nakig-alayon sab sila sa ahensiya sa gobiyerno alang sa pagpatuman niini. Taliwala sa pasalig sa kapolisan, giangkon ni Mayor Tomas Osmeña nga dakung hulga gyud sa umaabot nga kalihukan ang nahitabong pagpamomba didto sa Hilongos, Leyte gani dili niya pasaligan ang mga Sugbuanon nga dili kadto mahitabo dinhi sa Sugbo. Apan iyang gitataw nga kun magbinantayon lang ang katawhan, menus ang tsansa nga motumaw ang maong hitabo.

“It’s a very big threat, I’m not going to fool the Cebuanos by giving them any kind of assurance because I have none to give”, matud ni Osmeña.

Tinguha unta sa mayor nga mo-assign og volunteers nga mobantay sa kadalanan apan tungod sa kagamay na lang sa panahon giawhag niini ang neighborhood organizations nga mobantay sa mga lugar nga posibleng binlan og mga kadudahang butang sama sa Improvised Explosive Device (IED).

Nasayran sab nga nagpadala og suwat ang mayor sa kapolisan ug sa Philippine Drug Enforcement Agency sa niaging tuig alang sa jamming devices nga gitinguha niyang ibutang sa grandstand apan wala pa siyay tubag nga nadawat.

Tumong niyang himoon nga dead spot ang grandstand kay sagad sa mga IED, pabuthon gamit lang ang cellphone ug pinaagi niini malikayan ang maong hitabo.

Dugang sa mayor nga wala siyay planong mangimbitar og bisan kinsa nga VIP’s atol sa Sinulog kay mas tutukan nila ang peace and order. Apan iyang gihimug-atan nga welcome ang tanang motan-aw ug mosalmot sa kalihukan.

Samtang nipasalig ang kadagkuan sa Muslim community sa dakbayan nga motabang sila sa paghatag og seguridad sa umaabot nga Sinulog. Kini ang gipadayag ni National Commission on Muslim Filipinos-Visayas director Malu Manunggiring.

Matud ni Konsehal Dave Tumulak nga ang Muslim community makatabang gyud sa pagkontrol sa dasok sa mga tawo atol sa Sinulog.

Dugang ni Manunggiring nga tigumon niya ang iyang mga sakop karong Biyernes aron hisgutan ang maong plano. -/DILT (BANAT NEWS)