Aysus! naa pa si Kerwin

Mitingog na ang mga piniriso sa sub-provincial jail sa Leyte mahitungod sa kamatayon ni Albuera, Leyte Rolando Espinosa Sr.

Sumala pa sa mga piniriso, walay nahitabong shootout kay wala mosukol ang mayor sa dihang gi-serve ang search warrant sulod sa cell number 1 sa mga sakop sa Criminal Investigation and Detection Group (CIDG-8)

Matud sa mga saksi nga pag-abot sa mga sakop sa CIDG-8, wala kini modayon og sulod sa dihang nakakita nga adunay hayag punting sa CCTV camera. Pagpalong sa suga, pito ka tawo ang misulod sa prisohan ug gipadapa ang mga piniriso.

Pagsulod sa pipila ka sakop sa CIDG-8 sa cell number 1, nangayo pa og katahuran ang mayor. Miingon kini “ayaw ko ninyo’g plantere sir, wa ko ana.” Unya mihangyo kini nga moadto sa kasilyas.

Apan sa dihang mitubag ang usa sa mga polis sa CIDG-8 nga dili na angay moadto ang mayor sa kasilyas, misunod dayon ang pakapaka sa boto sa armas. Wala magdugay, nakit-an dayon ang mayor nga nagligdas sa kaugalingong dugo.

Sa cell number 8, nakit-an dayon ang laing piniriso nga nagkadugo na usab. Ang duha patay dihadiha dayon. Sa Facebook, gibandilyo sa mga netizens ang affidavit ni Espinosa nga naghingalan sa mga tawo nga nagprotehir sa iyang negosyo.

Kini naglakip kang Senador Leila de Lima. Ang pagprotehir sa senadora sa mga drug lord wala na man malilong. Gani, iyang mga drayber ug bodyguard nga iyang gipang-uyab (sumala sa nahibaw-an sa Senate inquiry), mao man ang giingong kolektor sa senadora.

Si Jaybee Sebastian, ang gikaintapan nga konbiktadong piniriso sa New Bilibid Prison mitestigo sa Senate hearing nga gikolektahan siya og P5 milyon alang sa kampanya pagka-senador ni De Lima.

Hangtod karon, wala gyud motubag si De Lima sa mga pasangil.

Hinuon, niadtong Lunes, human mitingog si Justice Secretary Vitaliano Aguirre III nga adunay posibilidad nga si De Lima ang nagpapatay kang Espinosa, nagmartsa si De Lima paingon sa Korte Suprema uban ang iyang abogado ug kababayen-an.

Sa Korte Suprema, gisang-at ni De Lima ang petisyon alang sa writ of habeas data batok kang Presidente Rodrigo Duterte.

Wala motak-om ang Malacañang sa mga aksiyon ni De Lima. Ang Malacañang miingon nga si De Lima migamit sa iyang pagka-babaye aron matabunan ang mga isyu ug salaod batok kaniya.

Wala na gyud diay silbe ang affidavit ni Espinosa karon nga patay na siya? Maaplay ba ang “Code of Omerta” – ang giisip nga code of silence pinaagi sa pagpatay sa tag-iya sa affidavit?

Basin nalimot si De Lima nga dako pang buhi si Kerwin Espinosa, ang anak sa mayor. Ini’g uli ni Kerwin gikan sa Abu Dhabi, makita gyud ang katag. Si Kerwin ug De Lima aduna ra bay litrato didto sa Baguio. Unsaon na lang!