Gustong makigminyo og langyaw

Dear Atty. Divine,

Duna koy pangutana labot sa among kaminyuon ug sa akong asawa. Lima ka tuig na kami nga minyo, apan wa mi anak. Karong bag-o, nag-away mi ug matud pa niya nga magbuwag na lang mi kay kadtong among kasal peke kuno kay wa siya’y birth certificate ug wa sab kuno siya’y baptismal certificate.

Naa man gud na siya’y ka chat nga Amerikano ug matud pa niya nga iya kuno minyoan ang foreigner aron siya makalarga sa Amerika. Ang akong pangutana attorney kun tinuod ba nga peke ang among kasal nga didto man mi nagpakasal sa huwes?  Mahimo ba diay siya nga makigminyo og lain nga kasal pa man siya nako? Daghang salamat. — Lito

Dear Lito,

Base sa balaod ang kaminyuon mahimo lang nga dili balido kun wa kini makatuman sa rekisitos nga gilatid sa atong Family Code, sama sa Marriage Ceremony, Marriage License, ug kinahanglan nga of legal age ang nagpakasal ug kinahanglan nga adunay authority nga mokasal ang nagpahigayon sa inyong kaminyuon.

Kanang Birth Certificate ug Baptismal Certificate dili na makaapekto sa validity sa kaminyuon ninyo. Base sa imong asoy nga huwes pa gyud ang nagkasal ninyo, so wa koy nakitang rason nga mahimong peke ang inyong kaminyuon.

Gawas pa, ang atong balaod nagkanayon nga kun ang inyong kaminyuon dunay depekto kay wa kamo makatuman sa rekisitos sa balaod, dili kini automatic nga invalid, kinahanglan pa ang party nga moadto sa korte aron ipadeklarar ang iyang kaminyuon nga void or ipa-annul ang iyang kaminyuon.

Buot ipasabot nga tungod kay wa ma-annul ang inyong kaminyuon dili mahimo nga magpakasal sa lain ang imong asawa kay makonsiderar kana nga Bigamous marriage ug mahimo nimo siyang ikiha niini. Thanks and God Bless. – Atty Divine

Alang sa inyong  pangutana, ipadala lang sa Legal Corner sa Banat News sa V. Gullas St., Ceu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.