Mga rookies sasalang sa PBA Draft Combine
MANILA, Philippines – May pagkakataon ang 12 PBA teams na kaliskisan ang 55 aspirante, kasama ang 12 miyembro ng Gilas Pilipinas, sa idaraos na 2016 Draft Combine ngayon at bukas sa Gatorade Hoops Center sa Shaw Boulevard, Mandaluyong.
Susukatin sa naturang two-day camp ang athleticism, agility, speed at basketball skills ng mga aplikanteng gustong mapasama sa 2016 PBA Rookie Draft sa Linggo sa Robinson’s Place sa Ermita.
Ang 55 aspirante ay hahatiin sa walong koponan na may tig-anim na players at maglalaro sa isang single-round elimination.
Matapos ito ay ihahayag ni PBA Commissioner Chito Narvasa ang listahan ng mga final draftees.
Ang mga miyembro ng Gilas Pilipinas, hahawakang muli ni coach Chot Reyes, na huhugutin ng 12 PBA teams sa special draft bago ang regular draft ay sina Mac Belo, Arnold Van Opstal, Jio Jalalon, Mike Tolomia, Carl Bryan Cruz, Ed Daquioag, Russel Escoto, Kevin Ferrer, Von Pessumal, Roger Pogoy, Matthew Wright at Alfonso Gotladera.
Samantala, nakatakdang resolbahin bukas ng PBA Board of Governors ang usapin sa drafting order ng special draft para sa Gilas Pilipinas.
Ang Blackwater ang maghihirang sa No. 1 overall pick ng 2016 PBA Rookie Draft kasunod ang Phoenix, Barangay Ginebra, Mahindra, Star, San Miguel Beer, Meralco, NLEX, Rain or Shine, Ginebra, Alaska at Phoenix.
Pipili sa second round ang NLEX, Rain or Shine, Globalport, Meralco, Alaska, Rain or Shine, Globalport, Phoenix, Rain or Shine, Mahindra, Alaska at Phoenix.
- Latest