Ang lunhaw nga mata sa kabaw
Ang atong tema, hinagdaw kini gikan sa ekspresyon nga pasiaw, apan nagdala ni’g mensahe sa dakong kamatuoran nga may kalabtanan sa atong kahimsog. Nga matud pa, ang kabaw wala’y kalainan sa tawo, nga nagbaton og 4 ka tiil, ang 2 niini gigamit sa pagsikad ug ang laing 2 sab niini, gamiton aron makahunat, sa ingon mahimong kusgan ug alisto sa paglihok.
Ang tawo mao gihapon, dunay 2 ka tiil, aron makatuyhad sa pagbarug ug 2 ka kamot nga gamiton sa pagkamas, nga mura’g tiil nga ikamang sa paglihok, kun dili na kahimo nga isugakod ang pagbarug sa kaugalingon.
Ang kabaw, himilian og pagkaon, nga maoy ilang kinaham ang mga sagbot nga buhi pa o lunhaw nga tan-awon. Apan kun malaya nga nangalarag na ang kalibunan, dili gyud mokaon, igo lang ungaron ug mongaab intawon sa kagutom.
Dinhi nagsugod ang pasiaw nga estorya sa pastol, nga naka-ideya og sulbad aron maulian ang gana sa pagkaon. Mura sab og nisaler, dihang gisulayan pagtaod og antipara, nga igtan-aw sa kabaw ang tanan pulos na lunhaw.
Haskang grabe ang kahangol sa paghabhab, bisa’g dili na preskong lunhaw ang mga gikaon, nga wa na’y mga nutrens o sustansyang mohimsog ang kabaw. Nabuhi kini nga daot ug bukogon, hangtod gihaya nga nitipon sa yuta.
Ang mga wate usab naminghoy nga bukog la’y nadimdim ug nga dili kahimo pagtabunok sa yuta, nga ang mga binhi igo lang sa pagtumaw, dili magdugay dayon og kahanaw.
Dili ba mao man sab ning ampay nato, patuyang lang sa pagkaon, nga bisan may mga sagol nga makahilong kemikal (toksins), mamahala na lang sige’g kaon niini, basta lamian nga makapabusdik, unya masakit, maluya hangtod manamilit?
- Latest