Gigabas nga relasyon

Sama sa gituohan sa uban, nagtuo usab ako nga adunay dako nga implikasyon ang paggabas ni Presidente Rodrigo Duterte sa relasyon tali sa Pilipinas ug Estados Unidos aron nga adto na kuno ang nasud makigkumbiya sa China ug Russia.

Sa iyang pagbisita sa China sa nakalabay'ng mga adlaw, mapagarbohon nga gianunsiyo ni Duterte atubangan sa mga opisyal sa maong nasud nga putlon na niya ang relasyon tali sa Amerika ug Pilipinas sa rason nga pakyas lagi kuno ang Amerika sa pagtabang sa atong nasud.

Iya na usab nga gibirahan ang Amerika gumikan sa kahigpit niini pag-abli sa ganghaan niini alang sa mga Pinoy, ug siya kuno mismo ang personal nga nakasinati niini. Kini sa dihang gibalibaran siya sa iyang pag-apply og visa aron pagduaw sa iyang hinigugma nga tua sa Amerika.

Tuod man, sa grabe nga pahumot sa presidente atubangan sa mga opisyal sa higante nga silingang nasud, nakakuha kini og bilyones ka dolyar nga loan, investment, hinabang ug uban pa nga business cooperation agreement gikan sa China.

Apan, tan-aw nako, dakong sipyat si Duterte sa iyang desisyon pagpahilayo sa nasud gikan sa Amerika. Mosugot man siya ug dili, padayon nga importante nga partner ang Estados Unidos sa Pilipinas sa aspeto sa ekonomiya ug politika. Kini bisan pa sa grabe nga pagyam-id sa presidente sa maong nasud.

Sa natad sa patigayon, dili ba nga ang misulbong karon nga mga call centers ug uban pa nga negosyo sa business process outsourcing (BPO) sa nasud halos naggikan man nga puhonan sa mga Amerikanhong negosyante? Kuyaw gayud nga maapektohan kining maong sektor niining deklarasyon ni Duterte.

Ikumpara sa China, hagbay ra nga nakagamot ang relasyon sa Pilipinas ug Estados Unidos. Gani, isip kabahin kanhi sa Amerika, maayo nga pagkasundog sa Pilipinas ang sistema sa politika sa maong nasud ilawom sa dahon sa demokrasya.

Sa grabeng personal nga kayugot nga gihambin ni Duterte sa Amerika, mura’g nagyagaw na hinuon ang dagan sa iyang foreign policy. Ambot kun unsay maayong benepisyo nga makuha sa Pilipinas niini sa aspeto sa ekonomiya, politika ug international diplomacy.