KP: Destabilisasyon batukan

CEBU, Philippines - Nanawagan ang Kilusang Pagbabago-Visayas sa katawhang Pilipinhon sa pagsupak sa bisan unsang lakang sa destabilisasyon sa administrasyon.

“Instead, let us exert our energies towards helping the administration and be partners for change,” matud ni Doris Mongaya, Visayas lead convenor sa  Kilusang Pagbabago-National Organizing Committee (KP-NOC).

Matud ni Mongaya nga ang administrasyon ni Duterte nagkinahanglan sa suporta sa katawhan tumong sa pagkab-ot nga gitinguhang kabag-ohan.

Nunot niini, si Mongaya nipahibawo nga ang KP chapters sa Visayas nilusad og mga kalihukan atol sa paghandum sa ika-31 nga tuig sa EDSA 1 kagahapon.

Kini naglakip sa paghatag og relief goods sa mga biktima sa sunog sa Barangay Tisa, Dakbayan sa Sugbo.

Namutang sab og tarpaulin nga “no to destabilization” ang mga sakop sa KP-Visayas sa ilang kabalayan.

Nakig-alayon sab ang grupo sa kabanay ni Emilio Aguinaldo sa pagpahigayon og pro-Duterte motorcade sa Metro Cebu. Ang Kilusang Pagbabago giumol ni Cabinet Secretary Leoncio Evasco kinsa maoy campaign manager ni Duterte sa niaging eleksiyon. (BANAT NEWS)