Weiss, Allen babandera sa Xterra Danao cast
MANILA, Philippines - Inaasahang muling mag-aagawan sina Bradley Weiss at Ben Allen para sa men’s crown, habang hangad naman ni Jacqui Slack ng Great Britain ang women’s title sa Xterra Off-Road Triathlon South sa Abril 23 sa Danao, Cebu.
Sinamantala ni Weiss ang pagkakamali ni Allen sa bike stage para angkinin ang titulo sa isa sa pinakamahirap na off-road races sa Albay.
Bukod kay Allen ay inaasahan ding makakahanap ng mabigat na laban ang South African ace hindi lamang sa elite field kundi pati na rin sa kurso sa Danao na susubok sa kanilang tibay, lakas at lakas ng pag-iisip.
“This event is one of the biggest in recent years for Danao City, which has hosted international MTB races. We’re happy and fortunate that Sunrise Events, Inc. has chosen us to host the event and we guarantee a triathlon to remember,” sabi ni Rep. Ramon “Red” Durano VI sa media launch ng event sa Coco Palms Beach Resort.
Itatampok din sa event, may 1.500m swim, 40km off-road bike at 10k trail run, ang pagiging isang top tourist destination ng Danao, ayon kay Durano.
Ang iba pang sumaksi sa event launch ay sina Provincial administrator Atty. Mark Tolentino, DOT Region 7 officer-in-charge Judy Gabato at Princess Galura kasama sina triathletes Noy Jopson, Clark Gothong, TJ Mayol, Bernard Sia at Michael Randy Uy.
Ang event ay nagsisilbing una sa tatlong Xterra races na pamamahalaan ng lungsod hanggang 2019 matapos pirmahan nina Durano at SEI general manager Princess Galura ang three-year contract.
Sinabi ni Galura na halos 400 triathletes ang inaasahang lalahok sa event, suportado ng Alcoplus, Sanicare, The Philippine Star, 2GO Express, Cetaphil, Prudential Guarantee, Columbia, Garmin, Tri Life, Cignal Hyper TV, Rocktape, Gatorade, MNTC, Coca Cola Femsa, Powerade, Wilkins at Storck, na may premyong $15,000 para sa mananalo sa pro division at P120,000 sa Asian Elite class.
- Latest
