Ina, ibinida ni Duterte

MANILA, Philippines -  Ipinagmalaki ni Pangulong Duterte ang kanyang ina na si Soledad Duterte sa talumpati nito sa Malacañang kamakalawa sa huling araw ng pagdiriwang ng Buwan ng Kababaihan na tinawag na “Digong’s Day for Women.”

Nagpahayag din ng panghihinayang ang Pangulo na hindi na naabutan ng kanyang ina ang pagkahalal niya bilang lider ng bansa.

“And sana kung buhay pa siya eh di mas maligaya siya lalo. So sabi ko sayang hindi umabot ang nanay ko. But inabot na niya na mayor na ako,” anang Pangulo.

Sinabi pa ng Pangulo na maging ang ina niya ay maaring hindi rin maniniwala na siya ay naging Pangulo.

“I finished high school for seven years. Kung saan-saan ako. But my sorrow really is that makita lang naman niya sana ako naging Presidente. But, of course, alam ko na hindi rin siya maniwala. Eh pati nga ako eh kung manalo ako,” pahayag ni Duterte.

Ayon pa sa Pangulo ang kanyang ina ang nagbigay ng tiwala sa kanya noong nabubuhay pa ito at hindi naman siya nagkamali.

“It was my mother na who had faith in me at hindi siya nagkamali. Though 75, 75 lang pero dumating naman ako sa lugar na ito, okay man pala,” sabi ng Pangulo.

Ikuwento rin ng Pangulo na namatay ang kanyang ama sa edad na 56 habang silang magkakapatid ay nag-aaral pa at nagkaroon ng nervous breakdown ang kanyang ina na naging dahilan para malubog sila sa utang.

Pero nang maka-recover umano ang kanyang ina, ito ang naghanap-buhay at nagpatapos sa kanila ng pag-aaral.

Pinayuhan din ng Pangulo ang mga kababaihan na dumalo sa okasyon na may anak na katulad n’ya ay bigyan ng konting partida dahil baka maging presidente rin ito.

“Kaya kung may anak kayo kagaya ko at you’re undergoing the ordeal just like my mother had to…Medyo bigyan ninyo ng konting partida baka ma-presidente pa ‘yan,” anang Pangulo.