Pacquiao wa modawat sa $5 Million

CEBU, Philippines - Si Pinoy ring star  Manny  Pacquiao  andam nga makig-away sa Australyanong si Jeff Horn apan dili alang sa sinsiyo.

Ang Canadian adviser ni Pacquiao nga si Mike Koncz nagkanayon nga ang gikatahong premyo nga $5 million (P245 million) alang sa eight-division world champion dili haum sa usa ka boksidor nga sama niya og kalibre.

Alang ni Koncz, gamay ra kaayo ang maong kantidad nga ilang dawaton alang sa usa ka higanteng away nga pagabidahan sa tinamod nga Pacquiao.

Niadtong Miyerkules, si Top Rank chairman Bob Arum nakighimamat ni Duco Promotions director Dean Lonergan didto sa Las Vegas ug dayon mipahibawo nga selyado na ang away nilang Pacquiao ug Horn karong Abril 23 sa wala pa hisayring binyu didto sa Australia.

Sa miagi niyang mga away, si Pacquiao midawat og dili momenos sa $20 million. Gani gikataho nga mibulsa siya og $100 million atol sa ilang superfight ni Floyd Mayweather Jr. niadtong Mayo 2015.

Apan daw mausab ang dagan karon kabahin sa premyo ni Pacquiao ilabi na kay mipahibawo nang daan si Arum nga ang sunod nga away ni Pacquiao iyang ipasalida sa telebisyon nga libre tibuok kalibotan. (BANAT NEWS)