Self defense

CEBU, Philippines -  Hingpit na nga mitahan sa kapulisan si David Lim Jr., ang suspetsado sa nahitabong road rage shooting ug nangangkon kining self defense ang nahitabo.

Si Chief Superintendent Noli Taliño, director sa PRO-7, miingon nga si Lim, Jr. , 28, mitahan pasado alas 2 kagahapon sa kaadlawon.

“Sinurender ng kanyang mother, kasama ng lawyer si David Lim,Jr. yung primary suspect ng road rage incident, wherein nagkaroon ng shooting incident ang victim ay isang Ehpraim Nuñal na nagkaroon ng tama ng baril sa dalawang paa,” matud pa ni Taliño.

Ang pamilya Lim nagpatabang sa buhatan mismo sa presidente ug pinaagi ni Bong Go ang Special Assistant to the President nadayon ang pagtahan niini.

Si Cebu City Police Office Director Joel Doria miingon nga kasong frustrated homicide ug illegal possession of firearms ang ilang ipasaka apan nausab kini ngadto sa frustrated murder ug illegal possession of ammunitions ngadto sa Office of the City Prosecutor.

Gikompirma ni Doria nga walay armas nga gi-surrender si Lim. Wala usab ang babayeng kauban ni Lim nga si Tamae Takahashi nga gikonsiderar nilang kakunsabo ni Lim sa maong krimen.

Gihagit

Ang abogado ni Lim nga si Atty. Orlando Salatandre nagduda nga kulang o putol ang video nga migawas sa social media kay ang gipakita kadto lang pagpamusil sa iyang kliyente.

“Present the full video,” matud pa ni Salatandre kinsa midugang adunay mga dagkong tawo nga kauban si Nuñal niadtong tungora maong nidepensa lang ang iyang kliyente.

“There was no intention to hurt the victim. But he kept on coming near David, so my client was forced to shot him on the legs to disable him,” dugang pa ni Salatandre.

Special treatment?

Samtang gihimakak ni Taliño nga adunay “special treatment” nga gihatag ang kapolisan kang Lim atol sa iyang pagtahan.

Si Taliño mipasabot nga gisulod sa opisina si Lim gumikan kay dunay imbestigasyon nga gihimo.

Si Salatandre miklaro nga walay gihatag nga special treatment nga nadawat ilang kliyente kay ang ilang pag-adto sa buhatan sa kapulisan mao lang ang pag “safe keeping” sa batan-ong Lim kay daghan na ang naglagot niini base sa mga komento diha sa social media. Gitug-an sab niya nga andam ang ilang kampo nga makig-areglo sa pamilya sa biktima.

Apan si Cebu City Mayor Tomas Osmeña nakaingon nga adunay special treatment kay lahi ang pagtratar sa kapolisan ngadto sa mga dato ug sa mga pobre. “You’re right, you’re absolutely right, why should he be given special treatment, that’s precisely what I’m complaining about sa atong culture, ang mga dato, ang mga bigtime special treatment,” matud ni Osmeña sa dihang gipangutana kabahin niini.

Ang siyudad maoy moabaga sa medical ug legal expenses sa biktima nga si Ephraim Nuñal apan kun di kini itugot sa Commission on Audit (COA) siya maoy personal nga mobayad niini.

Gusto sa mayor nga dili makig-areglo ang biktima aron madisiplina kining mga ‘spoiled brats’ sa siyudad ug sila makaamgo nga walay gipili ang balaod. Jojo Ugdol, Decemay P. Padilla ug Rowena D. Capistrano (BANAT NEWS)