Diaz gagawing motibasyon ang mga blessings sa 2020 Tokyo Olympics
MANILA, Philippines - Nagpasalamat si Rio Olympics silver medalist Hidilyn Diaz sa kaliwa’t kanang parangal na nakatakdang tanggapin nito kabilang na ang Athlete of the Year na igagawad ng Philippine Sportswriters Association (PSA) sa Annual Awards Night sa Pebrero 13 sa Le Pavilion sa Pasay City.
Nangunguna si Diaz sa listahan ng mga kikilalanin sa PSA Awards Night matapos ang kanyang matikas na kampanya sa Olympics noong nakaraang taon sa Rio de Janeiro, Brazil.
“Sobrang daming blessings ang natatanggap ko kaya nagpapasalamat ako kay God sa patuloy niyang paggabay sa akin at sa mga taong patuloy na sumusuporta at nagbibigay ng karangalan sa akin,” wika ni Diaz.
“Mas lalo akong nagiging inspirado sa mga ginagawa ko dahil alam ko na marami ang nakahandang sumuporta at tumulong para maabot ang pangarap nating lahat lalo na yung sa Tokyo Olympics sa 2020,” dagdag nito.
Tinuldukan ni Diaz ang 20 taong pagkauhaw ng Pilipinas sa medalya nang kubrahin nito ang pilak sa women’s 53-kg weight division sa likod ng gold medalist na si Hsu Shu-Ching ng Chinese Taipei.
Bumuhat si Diaz ng kabuuang 200 kgs. sa snatch at clean and jerk habang nagtala ng 212 kgs. ang Taiwanese lifter.
Sa katunayan, bago sumabak sa Rio Games, tansong medalya lamang ang target ni Diaz.
Subalit sinuwerte si Diaz nang mabigo si Li Yaiun ng China na makuha ang tangka sanang Olympic record.
Huling nanalo ng medalya ang bansa noong 1996 Atlanta Olympics mula kay boxer Mansueto ‘Onyok’ Velasco.
- Latest