Gipasanginlang kabit, guwardiya sa CSBT nireklamo

CEBU, Philippines - Kanhi guwardiya nga babaye sa Cebu South Bus Terminal (CSBT) nga nataktak sa trabaho, nagtiyabaw kay giingong wala masubay sa balaod ang iyang pagkataktak.

Si Jenette Misa, 40 anyos nipasangil kang Benedicto Julian, kawani sa Kapitolyo nga nadestino sa Civil Security Unit (CSU) nga maoy hinungdan sa iyang pagkataktak kay gipasanginlan siya nga nakigrelasyon sa laing guwardiya ug tungod niini gidapatan siya sa iyang bana.

Si Misa nga nahinabi sa mga tigbalita kagahapon, nibutyag nga ang iyang duty sa CSBT alas 2 sa hapon hangtud sa alas 10 sa gabii diin sa buntag nagpadayon siya og pagtungha sa kolehiyo sa kursong criminology sa usa  ka unibersidad sa dakbayan sa Sugbo.

Matud ni Misa nga matag human sa iyang duty mananghid gyud siya sa iyang mga kaubang guwardiya apan wala siya makabantay nga nagselos niya ang asawa sa guwardiya nga nadestino sa entrance sa terminal.

Giingong ang asawa sa maong guwardiya magpunay og estambay sa terminal kay magbantay sa iyang bana.

Asoy ni Misa nga niadtong buwan sa Hulyo human siya mananghid, kalit siyang gituslok og payong sa iyang buko-buko sa asawa sa maong guwardiya ug dayon gipakauwawan ug gipasanginlan nga adunay relasyon sa bana niini. Nakalitan si Misa sa hitabo ug wala na siya makahinumdum sa iyang buhaton tungod sa kauwaw.

Giingong ang maong asawa, nisumbong kang Julian ug giingong si Julian nirekomendar sa security agency nga iyang gitrabahoan nga ipataktak siya sa serbisyo kay naghimo siya og eskandalo sa CSBT.

Giingong human makahibawo ang bana ni Misa sa hitabo gidapatan siya sa iyang bana ug gipakita niini ang uwat sa paso sa sigarilyo ubos sa tuong bahin sa iyang mata.

Matud ni Misa nga gipitik sa iyang nawong ang opus sa sigarilyo sa iyang bana ug gipatiran usab siya hinungdan nga gipa-blotter niya kini ngadto sa polis.

Dugang niini nga wala siya ipaagi og proseso sa balaod hinungdan nga nireklamo siya sa Civil Service Commission ug sa Ombudsman-Visayas batok kang Julian. Nipadangat usab siya og reklamo ngadto sa National Labor Relation Commission batok sa security agency.

Si Julian kinsa nadestino nga drayber sa hepe sa Cebu Provincial Detention and Rehabilitation Center, wala makuhai og pamahayag sa Banat News kay giingong nilakaw kini kagahapon sa hapon matud sa record staff sa maong prisohan nga si  Michael Gornez kinsa maoy nakatubag sa tawag. (BANAT NEWS)